Leoncie hefur haft sigur í stríði við Ella Grill og félaga hjá Shades of Reykjavik. Búið er að taka lagið „Enginn þríkantur hér“ af Youtube. Þau fluttu eftirminnilega saman lagið „Enginn þríkantur hér“ árið 2015 en síðan átti eftir að slettast uppá vinskapinn.

Leoncie er ósátt við að Elli og Shades of Reykjavík hafi eignað sér lagið og dreift því á Youtube og víðar og segir Leoncie að hún og eiginmaður hennar eigi höfundarréttinn að laginu.

Lagið „Enginn þríkantur hér“ er lag sem Leoncie gaf út árið 2008 og flutti í breyttum búningi með Ella árið 2015. Fékk sú útgáfa mikla hlustun og athygli en Leoncie segist ekki hafa fengið neinar greiðslur fyrir.

„Þjófnaður um hábjartan dag,“ segir Leoncie í Facebook-færslu 8. ágúst síðastliðinn. Þá kallar hún rapphljómsveitina „hæfileikalausa“ og „vesalinga“ og sjálfa sig „indverska snillinginn Leoncie.“

Um helgina greindi svo Leoncie frá því að búið væri að taka niður lagið á Youtube vegna brota á höfundaréttarlögum. Í samtali við DV segir Leoncie að „íslenskir hrægammar í tónlistinni“ hafi haft af henni fjármuni með þessu. En Leoncie fagnar nú að búið sé að fjarlægja lagið á Youtube.

„Það var stolið frá mér laginu með því að selja höfundaréttarvarið efni á Youtube og fleiri stöðum,“ segir Leoncie en kveður svo fastara að orði. „Við hjónin erum hundleið að hæfileikalausir tónlistarfólk hérlendis eru sífellt að nota okkar höfundarréttarvarin Lög og borga ekki Stefgjald, og stinga peningum í sinn eigin vasa,“ segir indverska prinsessan og bætir við: „Við hjónin og fjölskyldan mín erum líka búin að fá nóg af ykkar heilabiluðu götudómstólum hér á landi. Það er meira um Copyright Theft á facebook síðunni minni.“

Þrátt fyrir allt er hin hæfileikaríka indverska prinsessa sáttari við lífið og tilveruna eftir að þessi niðurstaða varð ljós. Segir hún að réttlætið bragðist vel og Guð sé frábær.