„Það sem þetta virðist gera er að valda börnunum vanlíðan, til hvers og af hvaða ástæðu?“
Þetta er spurning sem barnasálfræðingurinn Fiona Martin spyr vegan nýs æðis sem vakið hefur athygli í netheimum. Um er að ræða hrekk – sprenghlægilegan að margra mati – sem gengur út á að sannfæra fólk, oftar en ekki börn, um að þau séu ósýnileg.
Eðli málsins samkvæmt taka börnin þessu yfirleitt með miklum fyrirvara til að byrja með, en þegar þeim er sýnd mynd breytist tónninn.
well that escalated quickly pic.twitter.com/pSMBMwILZX
— makayla cunningham☕️ (@_makaylaanne__) September 8, 2018
We did the invisible prank on my prima and it was the funniest thing ever ?(we had to exaggerate) pic.twitter.com/tKNbxYYP6A
— Lupita Ruvalcaba (@mariaruvalcba) September 3, 2018
Sitt sýnist hverjum um þessa hrekki sem vöktu fyrst athygli fyrir alvöru í Netflix-þáttunum Magic For Humans. Augljóst er að hrekkirnir geta fengið mikið á börn en gleðin sem skín úr andlitum hrekkjalómanna er ósvikin.
Fjölmargir hafa tjáð sig um þetta „æði“ á Twitter og spyrja margir hvernig það geti talist skemmtun að láta börn fara að gráta úr hræðslu.
Fiona Martin, sem er ástralskur doktor í barnasálfræði, tekur undir þetta og segir við News.co.au að allt sem veldur börnum vanlíðan, hvort sem um er að ræða hrekk eða ekki, sé ekki gott fyrir þau. Það liggi í augum uppi. Bendir hún á að sniðugra væri að gera uppbyggilega hluti með þeim sem líka eru skemmtilegir.
„Það er hægt að skapa hvetjandi og örvandi umhverfi fyrir börn með ýmsum leiðum en hrekkir eins og þessir hafa engan ávinning í för með sér,“ segir hún.