Markvörðurinn Jökull Andrésson skrifaði undir atvinnumannssamning við enska liðið Reading í vikunni. Jökull fagnar 17 ára afmæli sínu í lok mánaðarins og er talinn vera mikið efni. Hjá liði Reading hittir Jökull fyrir eldri bróður sinn, Axel Óskar Andrésson, sem er tvítugur varnarmaður. Eins og frægt er hóf Gylfi Þór Sigurðsson atvinnumannsferil sinn hjá Reading og því feta Andréssynir troðna slóð þar ytra.
Faðir bræðranna gat sér einnig gott orð í íþróttum og gerir enn. Það er kraftajötuninn Andrés Guðmundsson. Andrés og eiginkona hans, Lára B. Helgadóttir, komu á laggirnar íþróttakeppni undir heitinu Skólahreysti árið 2005 og óhætt er að fullyrða að vinsældir verkefnisins hafi verið ótrúlegar.