Þann 19. júlí næstkomandi verður stórt skref stigið í íslenskri golfsögu þegar kylfingurinn Haraldur Franklín Magnús tekur þátt í Opna breska meistaramótinu í golfi. Haraldur Franklín verður þar með fyrsti íslenski karlkylfingurinn sem spilar á einu af risamótunum í golfi en þátttökuréttinn tryggði hann sér með því að enda í öðru sæti á afar sterku úrtökumóti fyrir stórmótið.
Foreldrar Haraldar Franklíns eru þjóðþekktir. Faðir kylfingsins er leikarinn Kristján Franklín, sem síðast skelfdi þjóðina, og í raun heimsbyggðina, sem illmennið í sjónvarpsþáttunum Ófærð. Móðir Haraldar Franklín er fjölmiðlakonan góðkunna, Sigríður Arnardóttir, betur þekkt sem Sirrý, sem um árabil hefur heillað þjóðina með alúðlegri framkomu og persónutöfrum.