Laxinn sem beit á í Sjávarfossi, rétt eftir klukkan sjö í morgun, reyndist vera um fimm pund en þetta mun vera í fyrsta sinn sem Bergþór dregur fisk að landi.
Bergþór er mikill baráttumaður fyrir bættum viðhorfum í garð geðsjúkdóma en árið 2011 hlaut hann hvatningarverðlaun ÖBÍ í flokki einstaklinga fyrir að stuðla að jákvæðri og uppbyggilegri umræðu um geðsjúkdóma á Íslandi.
Bergþór, sem er þjálfari knattspyrnuliðsins FC Sækó, þekkir geðföltlun vel af eigin raun og hefur náð miklum bata segir á vef FC Sækó. Fyrir utan þjálfarastörfin starfar hann jafnframt hjá batamiðstöðinni hjá Landspítalanum við Klepp.
„Bergþór greinist með geðsjúkdóm þegar hann er rétt rúmlega tvítugur. Við tók 10 ára tímabil þar sem hann var meira og minna inni á geðdeild en í kringum aldamótin fór Bergþór að vinna í sínu bataferli með aðstoð notendafélaga eins og Klúbbnum Geysi og Hugarafli,“ segir á vef FC Sækó.
„Bergþór hóf svo störf á geðsviði Landspítalans, 2006 sem fulltrúi notenda og talsmaður sjúklinga. Árið 2010 fór hann að vinna hjá Hlutverkasetri og þar varð fótboltaverkefnið geðveikur fótbolti til.“
Eins og sjá má á meðfylgjandi myndum sem fengnar eru að láni frá Reykjavíkurborg var bjart yfir fólkinu í morgun enda einn fallegasti dagur sumarsins að renna upp.
Dagurinn byrjaði fyrir allar aldir þegar starfsmenn Reykjavíkurborgar mættu ásamt fjölmiðlafólki og fylgdarliði upp að Elliðaám í morgun. Hér virða þeir Bergþór og Dagur Bergþóruson Eggertsson, borgarstjóri, fyrsta lax sumarsins fyrir sér.
Þórdís Lóa fagnar sínum fyrsta la, 64 cm hæng úr Sjávarfossi.
Ásgeir Heiðar, leiðsögumaður með nýjum formanni borgarráðs, Þórdísi Lóu Þórhallsdóttur, við fossinn í Elliðaánum.
Hér dregur Dagur sinn fyrsta lax að árbakkanum með aðstoð Ásgeirs Heiðars.
Jón Þ. Einarsson, veiðivörður, stendur vaktina við árnar í sumar.
Bergþór kominn út í á undir dyggri leiðsögn Ásgeirs Heiðars, leiðusögumanns í Elliðaánum.
Dagurinn byrjaði snemma. Hér ræða þeir Bergþór og borgarstjórinn málin.
Í þessu myndbandi má heyra erindi borgarstjóra í morgun. Hér skýrir hann frá titlinum Reykvíkingur ársins og gerir grein fyrir tilnefningunum í ár og hvers vegna Bergþór var valinn.
Og hér má sjá Bergþór renna fyrir þeim fyrsta: