Lagið er áróðurskennt og ögrandi en sendir skilaboð. Það talar um báða póla skyndikynna; vonina og þránna á annan boginn, tómleikann og vonbrigðin á hinn. Það hafa allir lent í því að kynnast einhverri nýrri og spennandi manneskju, ganga kannski aðeins of langt og njóta hennar til fulls. Komast svo fljótt að því að hún var lítið annað en fantasía sem stóðst ekki væntingar.
„Hversu oft hefuru vaknað daginn eftir og það eina sem þú hugsar er: „Hvernig kemst ég heim?“ Það fyrsta sem þú finnur eru óþægindin við að vakna við hliðina á einhverjum sem þú þekkir ekki. Þú getur ekki beðið eftir að komast út úr þessum aðstæðum sem þú leitaðir eftir kvöldinu áður,“ segir Harpa Tanja Unnsteinsdóttir söngkona hljómsveitarinnar.
Myndbandinu var leikstýrt af Ólöfu Birnu Torfadóttur sem hefur hlotið viðurkenningar fyrir stuttmyndirnar sínar, Síðasta sumar, Klofin og Litla Hraun, en þetta er fyrsta tónlistarmyndbandið sem hún gerir.
Hljómsveitin Like Last Year er byggð upp af einstaklingum með ólíka bakgrunna og skoðanir. Harpa Tanja nýgræðingur kemur inn með málefnalegar hugmyndir en enga reynslu af tónlistarbransanum og lærir af reynsluboltunum. Haddi Már og Þór Óskar hafa báðir spilað á fjölda hljóðfæra og nýta þá reynslu vel þegar þeir setjast fyrir framan tölvuna að mixa, en þar er Haddi sterkastur á trommurnar og Þór á gítarinn og bassa.
Pésú er nýjasti meðlimur hljómsveitarinnar og spilar á gítar.
„Framtíð þessa bands er að prufa okkur áfram og það kemur í raun ljós hver spilar á hvað, þegar á líður.”