Ný ævisaga kryddpíunnar Mel B, „Brutally honest“, hefur vakið talsverða athygli í heimspressunni. Ástæðan er ekki síst opinskáar lýsingar hennar á ástarsamböndum hennar við þá Eddie Murphy og Stephen Belafonte sem og eiturlyfjanotkuninni. Íslenskir aðdáendur verða þó fyrir sárum vonbrigðum því kryddpían eyðir ekki einni setningu í samband hennar við athafnamanninn Fjölni Þorgeirsson. Mel B og íslenski kvennaljóminn byrjuðu saman árið 1996 og varði samband þeirra í rúmt ár. Það vakti mikla athygli á sínum tíma enda voru Kryddpíurnar í hópi vinsælustu hljómsveita heims á þessum tíma. Birtust myndir af parinu á forsíðum erlendra stórblaða auk þess sem íslenskir miðlar létu ekki sitt eftir liggja.
Kryddpían virtist afar ánægð með Fjölni miðað við viðtöl sem hún veitti þegar þau voru saman. Í einu viðtalinu sagði hún að Fjölnir væri með „ótrúlegan líkama og væri yndislegur maður.“ Parið ráðgerði að gifta sig en skyndilega slitnaði upp úr sambandinu árið 1997. Hefur Fjölnir látið hafa eftir sér að tónlistarkonan hafi „verið í rugli“ og hann ekki viljað koma nálægt því. Hann hafi því hætt með henni ósáttur og það hafi tekið hann langan tíma að jafna sig.
Vonsviknir aðdáendur geta þó huggað sig við það að í fyrri ævisögu sinni „Catch a Fire“, sem kom út árið 2002, þá minntist kryddpían á Fjölni. „Eftir þetta byrjaði ég með Fjölni Þorgeirssyni frá Íslandi, sem ég kynntist einnig í Blackpool. Ég féll kylliflöt fyrir honum en síðan flutti hann aftur til Íslands. Samband okkar var mjög ástríðufullt.“ Svo mörg voru þau orð.