Söngkonan og rithöfundurinn Birgitta Haukdal steig fram í gær og sagði að henni þætti leitt ef hún hefði sært fólk með orðavali í nýjustu bók sinni um Láru sem fer til læknis. Á einum stað er talað um hjúkrunarkonu í stað hjúkrunarfræðings. Vísir birti frétt og greindi frá því að hjúkrunarfræðingar væru ósáttir við orðavalið. Þá deildi Herdís Sveinsdóttir, prófessor og deildarforseti Hjúkrunarfræðideildar Háskóla Íslands einnig á Birgittu. Birgitta hefur lofað að laga mistökin fyrir næstu prentun.
Og eins og Jens Kr. Guðmundsson bendir á standa nú öll spjót úti og beinast þau að Birgittu Haukdal. Jens er þekktur bloggari hjá Morgunblaðinu og kallar sig þar Jens Guð. Jens hrósar Birgittu og kveðst ætla að gefa sínum barnabörnum bækur hennar. Er Jens mikill aðdáandi Birgittu en hafði áður gert grín að henni á nokkuð kvikindislegan hátt. Árið 2007 var Jens að horfa á Laugardagslögin þar sem Birgitta „raulaði eitt lag.“ Jens hafði aldrei hitt Birgittu og þekkti hana ekkert. Þar sagði Jens:
„Athygli mína vakti óeðlilegur sjálfbrúnkulitur á bringu og höndum Birgittu. Liturinn var kjánalega gulur. Þetta þarf að rannsaka. Það er ástæða til að fá upplýst hvaða sjálfbrúnkukrem lék stelpuna svona grátt. Það var hörmung að sjá þetta.“
Tveir dagar liðu og þá barst Jens jólakort. Og viti menn, jólakortið var frá Birgittu Haukdal.
„Elsku Jens Guð (teikning af hjarta). Ég óska þér gleðilegra jóla og vona að þú hafir það yndislegt. Þín Birgitta H. P.s. Töfrakremið heitir Beautiful 4 ever (brosmerki).“
Jens segir að jákvæðni Birgittu hafi slegið hann út af laginu. Í dag má skilja sem svo að hann sé mikill aðdáandi. Jens segir um jólakort Birgittu:
„Þar afvopnaði hún mig til lífstíðar. Steinrotaði mig með óvæntum viðbrögðum. Síðan hef ég ekki og mun aldrei segja né skrifa neitt neikvætt um hana. Það er mikið varið í manneskju sem tæklar ókurteisi í sinn garð svona glæsilega.“
