Íslenska rappið hefur notið vaxandi vinsælda undanfarin misseri og hafa fjölmargir ungir og efnilegir tónlistarmenn verið að gera góða hluti í senunni. En hvað finnst útlendingum um íslenska rappið?
Shadey Bangs er með býsna vinsæla YouTube-síðu, en áskrifendur síðunnar eru 111 þúsund talsins. Þá er hún með rúmlega sautján þúsund fylgendur á Instagram.
Shadey og kollegi birtu í gær ansi skemmtilegt myndband þar sem þau hlusta á íslenska rapptónlist og bera hana saman við rapptónlist frá Svíþjóð og Þýskalandi. Um er að ræða til dæmis lög eftir Aron Can, JóaPé og Króla, Flóna og Emmsjé Gauta.
Fyrst hlusta þau á lagið Fullir vasar með Aroni Can. Bæði virðast nokkuð hrifin af laginu og gefa því einkunnina 8. Næst er röðin komin að laginu Sósa með JóaPé og Króla. Lagið fær einkunnirnar 7 og 8. Þriðja lagið sem þau taka fyrir er lagið OMG með Flóna, Birni og Joey Christ. Lagið fær einkunnirnar 6 og 7. Tvö síðustu lögin, Þetta má með Emmsjé Gauta, og Ungir Strákar (Deep Mix) með Flóna frá svo einkunnirnar 8 og 9.
Það er skemmst frá því að segja að íslensku rappararnir hafa betur gegn kollegum sínum frá Svíþjóð og Þýskalandi. Meðaleinkunn íslensku laganna er 7,8 en 4,8 hjá Svíþjóð og 7,3 hjá Þýskalandi.
Þetta skemmtilega innslag má sjá hér að neðan: