The Big Bang Theory-stjarnan Jim Parsons er hæstlaunaði leikari í sjónvarpsþáttum í heiminum samkvæmt nýbirtum lista tímaritsins Forbes. Jim þénaði 26,5 milljónir dollara á því tólf mánaða tímabil sem listinn nær yfir, eða tæpa þrjá milljarða króna. Er þetta fjórða árið í röð sem Jim trónir á toppi listans, en meðleikarar hans í The Big Bang Theory eru ekki langt undan.

Í öðru sæti er Johnny Galecki og Kunal Nayyar og Simon Helberg eru jafnir í 3. til 4. sæti. Tekið skal fram að listinn nær eingöngu til leikara, ekki leikkvenna. Ætla má að fjórmenningarnir úr The Big Bang Theory verði ekki mikið lengur á listanum þar sem síðasta serían af þáttunum er í loftinu um þessar mundir.

Spacey út – Lincoln inn

Samkvæmt frétt Forbes voru laun leikaranna könnuð frá 1. júní árið 2017 til 1. júní í ár. Allar tekjur eru fyrir skatta og er ekki búið að draga frá gjöld fyrir umboðsmenn og lögfræðinga. Tekjurnar byggir Forbes á gögnum frá Nielsen, Box Office Mojo og IMDb, sem og viðtölum við fagmenn í bransanum.

Tíu hæstlaunuðu sjónvarpsleikararnir þénuðu 181 milljónir dollara á þessu tímabili, fjórum milljónum minna en á síðasta lista sem gefinn var út fyrir ári síðan.

Meðal annarra nafna á topp tíu listanum eru Mark Harmon úr NCIS og fjórir leikarar úr Modern Family. Andrew Lincoln úr The Walking Dead kemur nýr inn á listann og vermir tíunda sætið. Athygli vekur að Kevin Spacey, sem fór með aðalhlutverkið í House of Cards, er dottinn af listanum eftir að honum var sagt upp vegna ásakana um kynferðisofbeldi.

Hér er listinn yfir tíu hæstlaunuðu sjónvarpsleikarana í heiminum:

1. Jim Parsons – 26,5 milljónir dollara
2. Johnny Galecki – 25 milljónir dollara
3. Kunal Nayyar – 23,5 milljónir dollara
4. Simon Helberg – 23,5 milljónir dollara
5. Mark Harmon – 19 milljónir dollara
6. Ed O’Neill – 14 milljónir dollara
7. Eric Stonestreet – 13,5 milljónir dollara
8. Jesse Tyler Ferguson – 13 milljónir dollara
9. Ty Burrell – 12 milljónir dollara
10. Andrew Lincoln – 11 milljónir dollara