Leikkonan og aðgerðarsinninn Selma Blair tilkynnti það fyrir nokkrum klukkustundum að hún væri með MS-sjúkdóminn. Tilkynnti Selma það í einlægri færslu á Instagram, en sjúkdómsgreininguna fékk hún um miðjan ágúst á þessu ári.
Í byrjun færslunnar þakkar hún búningahönnuði þáttanna Another Life, sem sýndir verða á Netflix á næsta ári, fyrir að hjálpa sér að klæða sig. Þá þakkar hún einnig framleiðendum þáttanna fyrir að veita sér tækifæri þrátt fyrir sjúkdóminn.
„Einkenni sjúkdómsins aukast. Ég er með vinnu fyrir Guðs náð og skilning framleiðandanna hjá Netflix. Dásamlega vinnu,“ skrifar Selma og heldur áfram.
„Ég er fötluð. Stundum dett ég. Ég missi hluti. Minni mitt er þokukennt. Og vinstri hlið mín er að biðja bilað GPS-tæki um að vísa sér veginn. En við erum að gera þetta.“
Fékk ekki greiningu fyrr en hún datt
Þá þakkar Selma einnig lækninum sínum, sem hefur reynt að fá greiningu og hjálp fyrir leikkonuna í fjölda ára.
„Ég hef verið með einkenni árum saman en þau hafa aldrei verið tekin alvarlega fyrr en ég datt fyrir framan hann þegar ég var að reyna að finna út úr því sem ég hélt að væri klemmd taug. Ég hef örugglega verið haldin þessum ólæknandi sjúkdómi í að minnsta kosti fimmtán ár. Og mér er létt að vita það að minnsta kosti.“
„Ég vil leika við son minn aftur“
Hún segist vera bjartsýn í skugga erfiðleikanna.
„Ég vona að ég geti veitt öðrum von. Og jafnvel sjálfri mér. Maður fær ekki hjálp nema biðja um hana. Það getur verið yfirþyrmandi í byrjun. Þú vilt sofa. Þú vilt alltaf sofa. Þannig að ég hef engin svör. Ég vil sofa, sjáiði til. En ég er opin manneskja og ég vil lífsfyllingu á einhvern hátt. Ég vil leika við son minn aftur. Ég vil ganga niður götu og ég vil fara á bak. Ég er með MS og ég er í lagi. En ef þið sjáið mig missa fullt af drasli á götuna þá megið þið endilega hjálpa mér að taka það upp. Það tekur mig eina heilan dag. Þakka ykkur fyrir og ég vona að við eigum öll góða daga innan um áskoranirnar.“
Selma er 46 ára og á soninn Arthur Saint Bleick, sem varð 7 ára í sumar. Hún náði athygli sjóvnarpsáhorfanda vestan hafs í þáttunum Zoe, Duncan, Jack and Jane árin 1999 og 2000 og heimurinn heillaðist af henni á hvíta tjaldinu sem Cecile Caldwell í költmyndinni Cruel Intentions árið 1999. Hún hefur leikið í fjölmörgum myndum síðan þá, svo sem Legally Blonde, Hellboy, Storytelling, In Their Skin og nú síðast Mom and Dad.