Svo virðist sem markaðsvirði á stráum hafi rokið upp í kjölfar umfjöllunar um kaup Reykjavíkurborgar á höfundarréttarvörðum dúnmels-stráum frá Danmörku sem eru í beði fyrir utan braggann fræga í Nauthólsvík. Þessar upplýsingar, sem Eyjan greindi fyrst frá, hafa vakið mikil viðbrögð þar sem borgin borgaði rúmlega 757 þúsund krónur fyrir stráin og aðrar 400 þúsund krónur til að planta þeim í beðið.
Sjá einnig: Þessi strá fyrir utan braggann kostuðu 757 þúsund krónur – Höfundaréttavarin og keypt frá Danmörku
Minnst tveir hafa sett strá til sölu á Fésbókarsíðunni Brask og Brall, biðja strásölumennirnir um upphæðir sambærilegar þeim sem borgin borgaði fyrir stráin í Nauthólsvík. Tómas Logi Hallgrímsson tíndi stráin sem sjá má hér fyrir neðan á Snæfellsnesi, vill hann fá 700 þúsund krónur fyrir.
Tómas segir í samtali við DV að hann sé ekki búinn að fá nein tilboð. „Engin tilboð enn, en það er mikill áhugi,“ segir Tómas og tekur fram að virðisaukaskattur og flutningskostnaður sé ekki innifalinn. Segir hann að stráin sem hann tíndi séu ekki höfundarréttarvarin lagalega séð en hefur íhugað að leitast eftir að fá höfundarréttinn að þeim. Hyggst hann halda áfram að auglýsa stráin á Snapchatinu sínu kjullibangsi.
Auglýsing Tómasar hefur vakið mikla athygli og fengið talsvert af athugasemdum og fyrirspurnum. Þar á meðal frá Páli sem segist hafa höfundarrétt á þessum stráum og Hafdísi sem spyr: „Eru þau góð í kringum bragga?“