Stórsýningin Íslenskur landbúnaður 2018 verður haldin í Laugardalshöll 12. – 14. október. Síðasta stóra landbúnaðarsýning var haldin í Höllinni árið 1968 eða fyrir 50 árum. Sú sýning var einstaklega vel sótt af borgarbúum og bændum.
„Þetta verður stærsta landbúnaðarsýning sem haldin hefur verið í Höllinni og hafa þegar um 100 sýningaaðilar pantað bása bæði á úti- og innisvæði og allt uppselt,“ segir Ólafur M. Jóhannesson framkvæmdastjóri sýningarinnar.
Að sögn Ólafs kemur mest á óvart hversu fjölbreyttur landbúnaður er stundaður á Íslandi: „Það eru ekki bara okkar fjölbreyttu og hreinu matvæli sem streyma frá íslenskum býlum heldur stunda bændur ferðaþjónustu í æ meira mæli og líka skógrækt, orkuframleiðslu og hvers kyns heimilisiðnað og allt verður þetta kynnt á sýningunni. Það verður ekki bara hægt að smakka og kynnast nýjungum í íslenskri matvælaframleiðslu heldur líka nýjustu tækjum og tólum og ýmsu fleiru. Og svo verður afar áhugaverð fyrirlestradagskrá.“
Sýningin Íslenskur landbúnaður 2018 verður opin á föstudag 12. október kl. 14-19, laugardag 13. október kl. 10-18 og sunnudag 14. október kl. 10-17. Miðar gilda alla helgina og verð er aðeins 1.000 kr. og frítt fyrir aldraða, öryrkja, námsmenn og börn yngri en 12 ára í fylgd með fullorðnum.