8.300 manns lögðu leið sína í kvikmyndahús um helgina til að sjá Lof mér að falla. Frumsýning hennar er fjórða stærsta opnun frá upphafi á íslenskri kvikmynd og stærsta frumsýningarhelgi á íslenskri mynd síðan 2016.
Í tilkynningu frá aðstandendum myndarinnar kemur fram að aðeins Mýrin, Bjarnfreðarson og Eiðurinn hafi þénað meira á frumsýningarhelgi.
Lof mér að falla var heimsfrumsýnd á fimmtudagskvöld á kvikmyndahátíðinni í Toronto og voru viðbrögðin góð. Hefur myndin hlotið góða dóma frá gagnrýnendum.
Lof mér að falla segir frá hinni fimmtán ára Magneu (Elín Sif Halldórsdóttir), sem kynnist Stellu (Eyrún Björk Jakobsdóttir), sem er átján ára, og þróar sterkar tilfinningar til hennar. Stella notfærir sér þetta og leiðir Magneu inn í grimman heim sem tekur toll af þeim báðum. Sagan gerist yfir margra ára skeið og gengur út á örlagarík uppgjör, minningar og kaldan veruleika fíkninnar og aðstandenda ungmenna í neyslu.
Baldvin Z, leikstjóri myndarinnar, leikstýrði Vonarstræti sem sló eftirminnilega í gegn og 58,000 gestir sáu árið 2014. Lof mér að falla er að byrja um 30% prósent betur, að því er segir í tilkynningunni, og stefnir að verða aðsóknarmeiri en Vonarstræti.