Í september árið 1975 ráku blaðamaður og ljósmyndari Dagblaðsins upp stór augu þegar þeir gengu fram hjá leikfangaverslun í Reykjavík.
Þar mátti sjá dúkkur sem er ekki frásögu færandi nema vegna þess að þær voru allar kviknaktar og í líki fullorðinna kvenmanna. Ein þeirra var með perlufesti og önnur með kórónu og borða fegurðardrottningar. Að öðru leyti allsberar.
Fjölmiðlamennirnir spurðu búðareigandann um dúkkurnar og komust að því að þetta væri vesturþýsk framleiðsla og að engin dúkkuföt væru fáanleg fyrir línuna.
Veltu þeir því fyrir sér hvaða tilgangi þær þjónuðu í versluninni.