Nú er unnið hart að því að koma húsinu við Víðimel 29 í samt horf. Húsið, oft kallað „kanslarahöllin,“ þykir einstaklega fallegt og er hannað af Einari Sveinssyni arkítekt sem einnig hannaði fjölmarga barnaskóla í borginni, borgarspítalann og sundlaugarnar í Laugardal. Húsið hýsti um langa hríð kínverska sendiráðið. Kínverjarnir þóttu skilja afspyrnu illa við húsið og dróst í mörg ár að selja það. Í átta ár stóð húsið ókynnt. Þannig endast hús ekki lengi. Íbúar vesturbæjar kvörtuðu sáran í áraraðir undan illri meðferð hússins og ástandi þess.
Friðbert Friðbertsson, forstjóri Heklu, keypti húsið á þessu ári og standa nú yfir metnaðarfullar endurbætur á þessari byggingaperlu Reykvíkinga. Vesturbæingar fögnuðu. Af framkvæmdunum að dæma hefur það verið gjörónýtt að innan og mikilla endurbóta er þörf að utan.
En eftir stóð garðurinn. Fölnaði gleði Vesturbæinga talsvert þegar Friðbert felldi stærðarinnar tré í garðinum. Af árhringjum að dæma var tréð líklega nær Jóni forseta í aldri en þeim er þetta ritar. Ætli það fái ekki nýtt hlutverk sem spænir í hesthúsi.
Skapandi eyðilegging er alltaf umdeild, en er hún alltaf nauðsynleg? Í þéttu og grónu hverfi er varla hægt að skapa og skapa, einhverntímann hlýtur að þurfa að eyðileggja líka. Vonandi verður trjáfellingin ekki súr gúrka í eftirrétt Víðmelinga. Þeir eiga skilið betri eftirrétt en það.