Ástæðan fyrir því að nei-sinnar reyna að blekkja með því að þjóðaratkvæðagreiðslan 29. ágúst snúist um aðild að ESB er að fleiri eru andvígir aðild en því að fara í aðildarviðræður til að fá samning á borðið. Þessi blekking hentar þeim! Pawel Bartoszek, þingmaður Viðreisnar og formaður utanríkismálanefndar Alþingis, er gestur Ólafs Arnarsonar í hlaðvarpi Eyjunnar.
Það hefur hins vegar verið dálítið áberandi, finnst mér og ég auðvitað er ekkert hlutlaus í þessu máli frekar en þú og ég er í þínu liði. En mér hefur fundist bera mikið á því að nei-sinnar, þeir eru að halda fram hlutum sem að byggjast ekki á staðreyndum. Því er haldið blákalt fram að atkvæðagreiðslan núna 29. ágúst snúist um aðild að Evrópusambandinu en ekki að fara í viðræður til þess að ljúka samningi til þess að síðan sé hægt að taka afstöðu til þess samnings. Mér finnst nei málflutningurinn á köflum, ég ætla nú ekki að gera lítið úr öllu sem þaðan kemur, en á köflum finnst mér hann beinlínis ætlaður til að blekkja.
„Já, þarna náttúrlega væntanlega eru menn með þá strategíu að menn átta sig á því að menn hafa horft á kannanir og séð að það er töluvert meiri stuðningur við hugmyndina um að klára viðræðurnar. Af því að þjóðin virðist alla vega vera svona eins og komið er, meirihluti hennar á því að það sé sniðugt, að það sé góð hugmynd að ganga til viðræðna, klára þær og fá endanlegan samning. En ef fólk er núna á þessari stundu spurt um aðild, já eða nei, þá eru þeir örlítið fleiri sem eru kannski efasemdamenn samkvæmt nýjustu könnunum. Þannig að þess vegna auðvitað er það strategían hjá Nei-hreyfingunni að reyna að sannfæra fólk um að þessi kosning snúist í rauninni um aðild að Evrópusambandinu, sem hún auðvitað gerir ekki.
Mér er það eftirminnilegt þegar við í utanríkismálanefnd spurðum Feneyjanefndina nokkurra spurninga um þessa atkvæðagreiðslu, meðal annars að tillögu formanns Sjálfstæðisflokksins, reyndar voru fleiri sem tóku undir hana, og þá án þess að í rauninni væri sérstaklega um það spurt kom Feneyjanefndin með þær ábendingar að það væri mjög mikilvægt, mjög mikilvægt að stjórnvöld héldu því ekki að kjósendum að þessi atkvæðagreiðsla snerist um aðild, heldur einungis aðildarviðræður, vegna þess að aðild Íslands að Evrópusambandinu er ekki á borðinu á þessari stundu. Íslensk stjórnvöld geta ekki ákveðið á morgun að ganga í Evrópusambandið. Til þess þarf auðvitað bæði viðræður, samning og síðan samþykki allra hinna ríkjanna. Eina sem við getum á þessari stundu gert er að ákveða að við höfum áhuga á því að hefja þessar viðræður að nýju. Þannig að það hefur beinlínis verið stafað ofan í okkur að við mættum alls ekki halda því fram við kjósendur að þessi atkvæðagreiðsla snerist um aðild, heldur aðildarviðræður og það er dálítið hjákátlegt að fólk kemur síðan og reynir að halda þessu fram.“
Já, ég tek undir það með þér og svo hefur líka borið á því, finnst mér, að því er haldið fram: Það er ekki um neitt að semja, það er enginn pakki til að kíkja í vegna þess að þessi pakki er óumbreytanlegur. Þetta bara stangast mjög á bæði við aðildarsamninga sem önnur ríki hafa gert og nýlegar yfirlýsingar forráðamanna innan Evrópusambandsins.
„Já, og það er bara mjög mikilvægt að halda þessu til haga af því að það er þá hitt sem menn reyna að segja til þess að sannfæra fólk um að það sé í rauninni ekkert, um að þetta sé bara kosning um ESB-aðild af því að það er ekkert í rauninni um neitt að semja og þá taka menn svona einhver nýlegri dæmi. En við verðum auðvitað að hafa það í huga að það hefur ekkert ríki eins og Ísland sótt um aðild að Evrópusambandinu síðustu þrjá áratugina. Ekki frá stækkuninni 1995, þá hafa þetta svona aðallega verið fyrrum kommúnistaríki í Mið- og Austur-Evrópu sem hafa verið að sækja. Reyndar kannski Malta og Kýpur falla ekki beint þar undir og Malta fékk nú nokkuð miklar sérlausnir í sínum aðildarsamningi.“
Og á sviði sjávarútvegs.
„Já, á sviði sjávarútvegs, þar sem voru settar sérstakar reglur inn í aðildarsamning sem gilda enn. En ef við lítum til fyrri dæma, , ég meina, þegar Svíþjóð og Finnland voru að ganga í Evrópusambandið, þá hefði einhver á þessum tíma getað sagt við Svía, Finna og bændurna þar: „Heyrðu, það er ekkert um að semja, þið þurfið bara að fá evrópsku sameiginlegu landbúnaðarstefnuna og það bara take it or leave it.“ En engu að síður þá settist fólk niður, útskýrði þær áskoranir sem myndu eiga sér stað gagnvart finnskum og sænskum landbúnaði og þau fengu sérlausn í þeim málaflokki. Þannig að uppgjöfin auðvitað leiðir okkur aldrei til neins. Við höfum og gerðum það í utanríkismálanefnd, við settum okkur nokkuð ítarleg samningsmarkmið sem byggðu á samningsmarkmiðum síðast þegar sótt var um og þau liggja fyrir. Ráðherra hefur nú skrifað greinar og ítrekað þessi markmið. Kristrún Frostadóttir, forsætisráðherra, og fleiri leiðtogar ríkisstjórnar hafa sagt þessa hluti að það komi ekki til greina að að afhenda yfirráð yfir íslenskum auðlindum og sjávarútvegsauðlindinni, þannig að þetta liggur alveg fyrir.
Hægt er að hlusta á hlaðvarpið í heild sinni hér:
Einnig er hægt að hlusta á Spotify.
