Í dag eru 45 dagar þar til við göngum til kosninga um viðræður við Evrópusambandið um fulla aðild Íslands. Þetta verða líklega mikilvægustu kosningar sem haldnar verða hér á landi en þær varða framtíð næstu kynslóða í landinu okkar.
Umræður um þetta mál hafa verið mjög líflegar að undanförnu og mörg samtök hafa verið stofnuð bæði af JÁ fólki og NEI liðum. Fjölmargar greinar hafa verið birtar og ítarlegar greiningar hafa komið fram um kosti og galla aðildar Íslands að ESB.
Flestar greiningar og skýrslur um málið hafa sýnt að full aðild muni bæta lífskjör í landinu okkar, auka stöðugleika efnahagslífsins, lækka vexti og matvöruverð og bæta samkeppnisstöðu Íslands á alþjóðamörkuðum auk þess að styrkja stöðu okkar í ótryggum heimi vopnaðra stríðsátaka og tollastríðs.
Fram hefur komið í „Eurobarometer“ könnun að um 74% íbúa í hinum tuttugu og sjö ESB löndum segja að land þeirra hafi hagnast á aðild sem er sögulegt hámark. Um 90% íbúa Möltu, Danmerkur, Portúgal og Lúxemborgar eru ánægðir með ESB aðild landa sinna. Ekkert ríki í ESB vill fara úr sambandinu.
Yfir 81% styðja sameiginlega varnarstefnu ESB sem er hæsti stuðningur í 20 ár. Mikil ánægja er með evruna í evrulöndum og traust til Evrópuþingsins í Brussel er það hæsta í áratugi. Þessi stærsta samvinnuhreyfing í sögu heimsins hefur sannað ágæti sitt enda eru hvergi betri lífsgæði í heiminum í dag. Þarna á Ísland heima í framtíðinni.
Fram hefur komið að ekkert hinna 27 ESB ríkja telja sig hafa glatað fullveldi sínu með fullri aðild. Þau hafa deilt fullveldinu með hinum þjóðunum og skapað þannig hag fyrir öll löndin.
Ekkert ESB landanna hefur þurft að gefa frá sér auðlindir en Evrópusambandið á engar slíkar og hefur engan áhuga á þeim. Reglur hafa verið settar um veiðar á sameiginlegum fiskistofnum sem synda um landhelgi ESB landanna til að tryggja sjálfbærni veiðanna. Ekkert slíkt á við okkar fiskimið og munum við halda fullum yfirráðum á þeim.
JÁ hefur alltaf borgað sig
Við Íslendingar sögðum skýrt JÁ í þjóðaratkvæðagreiðslunni 1944 um setningu nýrrar stjórnarskrár og stofnun lýðveldisins. Við sögðum JÁ við Nato aðild og JÁ með inngöngu landsins í EFTA. JÁ við EES samningnum er líklega það mikilvægasta á seinni tímum enda hefur sá samningur fært Ísland inn í nútímann með viðskipta- og ferðafrelsi.
Enginn efast nú um fyrri JÁ-kvæðar ákvarðanir þjóðar okkar. Segjum því JÁ í haust
JÁ í haust mun koma sér vel fyrir flesta hópa þjóðfélagsins en er þó mikilvægast fyrir unga fólkið í landinu. Skoðum málið nánar.
Það er ánægjulegt að heyra að samkvæmt nýjustu skoðanakönnunum mun meirihluti þjóðarinnar segja JÁ í ágúst. Meðal yngra fólks er munurinn mestur en um 65% þeirra ætla að kjósa með áframhaldandi viðræðum enda hefur það sínar skýringar.
JÁ fyrir unga fólkið
Við sem eldri erum þekkjum sveiflur og óstöðugleika íslenska hagkerfisins. Stöðugar gengisfellingar á síðustu öld og um 50% fall krónunnar í kjölfar bankahrunsins hafa leitt til fjárhagslegra hörmunga fyrir heimili og fyrirtæki, eignaupptöku og óstöðugleika sem má ekki endurtaka sig í framtíðinni.
Óstöðugur gjaldmiðill sem krefst áhættuálags við lántökur hefur kostað almenning þúsundir milljarða á undanförnum áratugum í formi okurvaxta sem eru enn í dag um sjö prósentustigum fyrir ofan eðlilega vexti í nágrannalöndum okkar sem ýmist nota evru eða danskar krónur sem eru tengdar við evru eins og í Færeyjum og á Grænlandi.
Íslenska krónan mun alltaf krefjast áhættuálags sem kostar íslensk heimili margar milljónir á hverju ári aukalega og að óþörfu þegar greitt er af venjulegum íbúðalánum, bílalánum og neyslulánum. Lántökur í krónum gerir heimilin að vogunarsjóðum með engan fyrirsjáanleika.
Með krónuláni og vísitölutengingum verða íbúðarkaup alltaf áhættufjárfesting sem eingöngu vogunarsjóðir með fullkomna áhættustýringu ættu að taka að sér.
Það er aðallega unga fólkið í landinu sem þjáist í þessu vaxtaokri krónunnar. Ungu fjölskyldurnar sem eru að stofna heimili og kaupa sínar íbúðir eða leigja taka á sig okurvaxtabyrðina. Þetta á unga fólkið í landinu ekki að sætta sig við.
Það má segja að krónan sé nýja vistarbandið sem forfeður okkar þurftu að búa við. Þeir fluttu tugþúsundum saman til Vesturheims meðal annars vegna þess. Mikil hætta er á að íslensk ungmenni flýi landið okkar vegna vaxtarokursins.
Með fullri aðild að ESB munu tækifæri ungs fólks til náms, starfa og listsköpunar í Evrópu aukast mikið. Þess má geta að um 68% ungs fólks í ESB löndum er bjartsýnt á framtíð ESB.
Drífðu þig á kjörstað og segðu JÁ fyrir framtíðina
Í viðtali við Morgunblaðið nýlega líkti Óðinn Freyr Baldursson formaður Ungra Evrópusinna aðildinni við það „að leggja nýjan veg sem geri þjóðinni kleift að komast hraðar og örugglegar á þann áfangastað sem hún vilji ná.“
Síðar í viðtalinu sagði Óðinn að „þjóðaratkvæðagreiðsla um að hefja aðildarviðræður sé ekki ákvörðun um inngöngu í Evrópusambandið. Hún snúist um að kanna hvaða kjör standi Íslandi til boða.“
Í lok viðtalsins kom Óðinn að kjarna málsins fyrir ungu kynslóðina þegar hann sagði að „spurningin um Evrópusambandið snúist síður um fortíðina en framtíðina“ og bætti svo við að „fyrir unga kynslóð sé mikilvægast að skapa hagkerfi sem bjóði upp á stöðugleika, fleiri tækifæri og meiri fyrirsjáanleika en það sem Ísland hafi búið við undanfarna áratugi.“
Þorbjörg Sigríður Gunnlaugsdóttir dómsmálaráðherra fjallaði einnig um þetta í nýlegri grein og sagði að „það er ekki skynsamlegt að berjast af krafti gegn samningi sem ekki hefur verið gerður. Gegn samningi sem ekki er orðinn til. Sagan hefur kennt okkur að það er átak að fara í gegnum umræðu um mikilvæg mál og vega og meta hvað er best fyrir Ísland.“
„Það borgar sig hins vegar alltaf að skoða kostina,“ sagði Þorbjörg Sigríður.
Ég hvet unga fólkið til að flykkjast á kjörstað laugardaginn 29. ágúst og gera okkur öllum kleift að skoða þá kosti sem eru í boði fyrir Ísland framtíðarinnar.
Í árinu 2026 eru 8760 klukkustundir.
Það tekur flesta innan við klukkustund að fara á kjörstað og kjósa.
Taktu frá þessa einu klukkustund og kjóstu JÁ fyrir framtíðina!
