Við munum fá sterka niðurstöðu varðandi sjávarútveg í aðildarviðræðum við Evrópusambandið. Einnig varðandi landbúnað. Það er mikið hagsmunamál fyrir bændur, ekki síst þá sem hafa fjárfest af myndarskap eða þá sem vilja komast inn í greinina að lækka fjármagnskostnað hér á landi með því að tengjast eða taka upp evru. Við eigum að gera ríkar kröfur um að við fáum að styrkja íslenskan landbúnað markvisst og þar þurfum við að forgangsraða. Þorgerður Katrín Gunnarsdóttir, utanríkisráðherra, er gestur Ólafs Arnarsonar í hlaðvarpi Eyjunnar.
Hér er hægt að hlusta á brot úr þættinum:
„Samstaða Evrópu með Danmörku og Grænlandi hjálpaði Íslandi og það hjálpaði líka NATO því á endanum leiddi það til þess að NATO, af því við Íslendingar, ég og líka forveri minn, Þórdís Kolbrún, að við vorum að tala fyrir auknum fókus á norðurslóðir og ég hef náttúrlega verið mjög markviss í því þegar kemur að mínum fundum sem utanríkis- og varnarmálaráðherra líka að tala um aukið vægi norðurslóða, að við þyrftum að efla eftirlit og öryggi og áætlanir og framkvæmdir á norðurslóðum og við erum að sjá það meðal annars í Arctic Center, sem er gríðarlega mikilvægt fyrir okkur. Þannig að þrátt fyrir Grænland, áhuga Bandaríkjanna á Grænlandi, þá hefur það að mínu mati enn sem komið er verið jákvætt fyrir okkur Íslendinga, jákvætt fyrir Norður-Atlantshafið, að það er komin meiri þyngd í þau mál innan NATO og við Íslendingar högnumst á því og við sjáum það til að mynda að Tyrkland, sem er með næststærsta heraflann innan NATO og hvað lengst frá okkur, að þeir eru núna í ljósi þessarar stöðu í heimsmálunum, þeir eru að opna sendiráð núna síðar á árinu hér á Íslandi. Það er auðvitað bara eitt merki um bæði samstöðu NATO en líka að við ætlum, öll aðildarríki NATO ætli að passa upp á norðurslóðir.“
Já, já, og það er náttúrlega einhvern veginn blasir við að það var gríðarlegur styrkur fyrir Grænland og fyrir Danmörku að Danmörk er í ESB og fékk allt afl ESB með sér.
„Já, algjörlega. Það er alveg ljóst að Danmörk gerði það og bara einfaldlega ný ríkisstjórn, hennar stjórnarsáttmáli undirstrikar enn meiri þyngd og áherslur þessarar nýju ríkisstjórnar um mikilvægi Evrópusambandsins fyrir Dani. Það er alveg augljóst að eftir þessa uppákomur síðustu vikna og mánaða vegna Grænlands að þá telur hin nýja ríkisstjórn enn frekar að það þurfi að byggja upp svona öryggisnet innan Evrópu og þeirra tengsl. En talandi um Dani og af því að við erum svona að tala líka um, svo við kannski komum aðeins að öðru líka varðandi Norðurlandaþjóðirnar innan Evrópusambandsins, að þá er þáttur sem við munum leggja ef við fáum til þess umboð frá þjóðinni að fara inn í viðræður og það verður náttúrlega skipuð mjög öflug samninganefnd ötulla og reynslumikilla aðila að þá held ég að landbúnaður, af því ég hef ekki áhyggjur af og ég er ekki að segja að ég hafi áhyggjur af landbúnaðinum en ég er algjörlega sannfærð um það að við munum fá sterka niðurstöðu með sjávarútveg og eins og ég segi, við erum fyrsta landið sem að væri að sækjast eftir því að vera aðili að Evrópusambandinu með þennan mikla styrkleika sem sjávarútvegurinn er. Við erum stórveldi, það er alveg ljóst af samtölum mínum við aðila í fiskveiðiiðnaðinum og í sjávarútveginum innan Evrópusambandsins, að það sem þeir sjá fyrst og síðast, og þetta eru þeir sem reka fiskveiðifyrirtækin, sjávarútvegsfyrirtækin innan Evrópusambandsins, að það er þekking, reynsla, innsæi okkar af sjálfbærri sjávarútvegsstefnu og þeir eru að tala um það að þeir vonist til þess þá að sjávarútvegur verði aðeins ofar á dagskránni hjá Evrópusambandinu, ég ætla ekkert að segja að hann verði efst en hann færist aðeins ofar með þessari vigt að fá Ísland inn og það verði þá einhver skynsemi sem komist þá enn frekar inn í þá fiskveiðistjórnun. Þannig að ég er mjög bjartsýn hvað það varðar og ég segi bara enn og aftur eins og oft er slett, pabbi verður núna brjálaður þegar hann heyrir þetta, bara „prove me wrong“ eða látum bara það á það reyna að ég hafi haft þá rangt fyrir mér í þessu.
Ég er algjörlega sannfærð um að við munum ná sterkri niðurstöðu hvað fiskveiðarnar varðar og það sem að ég ætlaði líka að segja varðandi landbúnaðinn af því að ég vil undirstrika það að það er gríðarlega mikilvægt fyrir okkur að hafa tækifærið áfram til þess að styðja ötullega við íslenskan landbúnað. Íslenskur landbúnaður, hann er einstæður. Ég tel líka að við eigum að forgangsraða þar. Við eigum að horfa og einblína fyrst og síðast á sauðfjárræktina, mjólkurbændur, nautgripabændur, hér heima til þess að þeir fái svigrúm til þess bæði að þróast áfram og líka ná fjárhagslega sterkari undirstöðu. Þeir vita það sem hafa heimsótt ekki síst mjólkurbúin eða kúabændur, að þeir hafa lagt í mjög metnaðarfullar fjárfestingar. Þeir eru að stækka, þeir eru með alls konar tæknivæðingu en þetta hefur auðvitað í för með sér gríðarlega mikinn fjármagnskostnað fyrir þessi bú sem eru svo mikilvæg fyrir íslenskt samfélag. Og það er nú einn ábatinn sem við vitum að yrði hvað mestur fyrir bændur sem hafa farið í fjárfestingar, að það er að lækka fjármagnskostnaðinn með því að annaðhvort að tengjast evru eða taka upp evru, það yrði gríðarleg búbót.
En þar fyrir utan þá tel ég að við eigum að láta á það reyna að jafnvel setja fram ítarlegri kröfur heldur en Finnar og Svíar gerðu, ekki bara ganga inn í það regluverk þó að það sé gríðarlega mikilvægt að þær þjóðir, þær fá að styrkja og niðurgreiða með ákveðnum hætti sínar búgreinar sem eru fyrir norðan 62. breiddargráðu. Þannig að okkar landbúnaður er þar, bara allur. Við bara erum þar og ég held að og tel að það geti haft verulega jákvæð skref í för með sér að sjá nákvæmlega hvað við fengjum þar og hvaða áhrif það hefði á íslenskan landbúnað. En líka er mikilvægt að hafa í huga áherslu Evrópusambandsins þegar kemur að nýliðun. Þeir leggja gríðarlega mikla áherslu á nýliðun í bændastétt, eitthvað sem að við höfum svolítið verið í erfiðleikum með hér af því að ungir bændur, konur sem karlar, hafa mikinn metnað eðlilega til þess að taka við búum, hvort sem það er af foreldrum sínum eða frændfólki eða einfaldlega kaupa sig inn í greinina.“
Hægt er að hlusta á hlaðvarpið í heild sinni hér:
Einnig er hægt að hlusta á Spotify.
