Þórður Snær Júlíusson, fyrrum ritstjóri Heimildarinnar, tilkynnti í vikunni að hann hygðist skrifa fréttabréf og birta vikulega. Fyrsta slíka bréfið birtist nú í morgunsárið og þar tekur Þórður Snær upp þráðinn í samfélagsrýni með sinni hefðbundnu pólitísku slagsíðu.  Um leið hófst pískur um að útgáfa fréttabréfsins sé til marks um það að áhugaverðari tilboð um atvinnu á pólitískum vettvangi hafi ekki staðið til boða eftir uppgjörið á Heimildinni fyrr í sumar sem varð til þess að honum var ýtt út úr ritstjórastóli.

Orðið á götunni er að Þórður Snær hafi látið vita af sér hjá ýmsum stjórnmálaflokkum og boðist til að taka öruggt sæti á listum þeirra í komandi kosningum. Fyrst hafi verið leitað hófanna hjá Samfylkingunni sem þarf að manna mörg þingsæti, verði úrslit kosninganna í líkingu við allar skoðanakannanir í meira en heilt ár. Mikill straumur áhugasamra hefur verið til forystumanna Samfylkingarinnar um nokkurt skeið.

Margir vilja nú tryggja sér öruggt far með flokknum ef fram heldur sem horfir. Forysta flokksins hefur unnið að því í marga mánuði að stilla upp sigurstranglegum framboðslistum í öllum kjördæmum. Það starf mun ganga mjög vel. Ekki mun vera eftirspurn eftir Þórði Snæ á þá lista en hermt er að Samfylkingarfólk telji að hann tilheyri frekar Vinstri grænum en miðjuflokkum.

Orðið á götunni er að Þórður hafi einnig rætt við forystu Pírata um hið sama en ekki vakið áhuga. Flokkur fólksins mun heldur alls ekki vera spenntur fyrir Þórði Snæ enda ætla allir helstu þingmenn þess flokks að gefa kost á sér til áframhaldandi þingsetu.

Orðið á götunni er að einn af velunnurum Þórðar Snæs hafi talað mjög fyrir því í þeim flokki sem hann styður með ráðum og dáð að Þórði Snæ verði boðið ráðgjafastarf á þeim vettvangi. Svo virðist sem það hafi heldur ekki gengið upp.

Orðið á götunni er því að mun meira framboð sé af Þórði Snæ Júlíussyni á pólitískum vettvangi en eftirspurn.