Biden sagði ekki af sér forsetaembættinu og segist ætla að gegna því áfram. En þar sem hann sækist ekki eftir endurkjöri, þá getur hann gert nánast hvað sem er án þess að þurfa að hafa áhyggjur af afleiðingunum fyrir pólitískan feril sinn. Þetta er í fyrsta sinn sem hann er í þessari stöðu á hálfrar aldar pólitískum ferli sínum.
Repúblikanar hafa dregið upp þá mynd af Biden að hann sé einn öfgafyllsti forsetinn í sögu Bandaríkjanna en í umfjöllun um málið bendir NYPost á að hugsanlega hafi þeir aðeins fengið að sjá forsmekkinn af Biden fram að þessu.
Þar sem Biden þarf ekki að huga að endurkjöri þá getur hann verið ófeiminn við að gefa út forsetatilskipanir.
NYPost nefnir sem dæmi námslán en dómstólar hafa hafnað öllum þeim skilmálabreytingum sem stjórnvöld hafa gert á þeim. Segir miðillinn að Biden geti gengið enn lengra en áður og fellt niður afborganir námslána hjá öllum lánþegum alríkislána vegna lagalegrar óvissu sem ríkir um endurgreiðslurnar.
Biden gæti einnig gert neyslu kannabis refsilausa en stjórn hans hefur verið hikandi við að gera það og Repúblikanar eru því andsnúnir og segja að slík ákvörðun sé ekki byggð á „vísindum“ heldur sé „eingöngu pólitísk“. Nú gæti Biden gengið enn lengra en með því gæti hann tryggt Demókrötum atkvæði ungra kjósenda.
Hann gæti einnig aukið afskipti Bandaríkjanna af stríðinu í Úkraínu og sett strangari skilyrði fyrir aðstoð við Ísrael vegna stríðsins á Gaza.
Spurningin er hvort eitthvað muni stöðva hann í þessu eða hvort hann láti vaða.
