Það hlakkar nokkuð í Degi B. Eggertssyni, fyrrverandi borgarstjóra sem nú býður sig fram til Alþingis. Hann bendir á að landsmönnum hafi í dag borist tvær stórfréttir, annars vegar um mikinn hallarekstur ríkissjóðs og svo hins vegar um væntan rekstrarafgang Reykjavíkurborgar. Dagur birtir þórðargleðina á Facebook þar sem hann minnir á að Sjálfstæðisflokkurinn hafi gjarnan talað um að borgin sé með allt niður um sig í fjármálum, þegar flokkurinn ætti með réttu að líta í barminn á sinni eigin ríkisstjórn.
„Frambjóðendur Sjálfstæðisflokksins í Alþingiskosningum hafa dálítið verið með borgina og borgarmál á heilanum. Það er sniðugt. Á forsíðu Morgunblaðsins í morgun segir að fjárlög ríkisins fyrir næsta ár stefni í 58,6 milljarða halla. Það er sjöunda árið í röð sem fjárlög ríkisins verða með halla. Á sama tíma leggur meirihlutinn í borgarstjórn fram fjárhagsáætlun þar sem afgangur er af rekstri, bæði á þessu ári og því næsta. Og næstu fimm ár.“
Reykjavíkurborg sé í mikill uppbyggingu. Slíkt kalli á fjárfestingu. Engu að síður hafi meirihlutanum í borgarstjórn tekist að ná jafnvægi í hlutfalli skulda af tekjum. Í raun sé borgin með eitt lægsta skuldahlutfall á höfuðborgarsvæðinu og töluvert lægra en ríkissjóður.
„Borgin er í mikilli uppbyggingu og það kallar á fjárfestingu. Engu að síður höfum við náð jafnvægi í hlutfalli skulda af tekjum. Skuldahlutfall borgarinnar í heild er raunar helmingi lægra en það var þegar við Jón Gnarr tókum við stjórn borgarinnar af Sjálfstæðisflokknum árið 2010. Sjá mynd. Og ef skoðaðar eru skuldir borgarsjóðs sem hlutfall af tekjum er það skuldahlutfall eitt það lægsta á höfuðborgarsvæðinu – og töluvert lægra en sambærilegt hlutfall ríkissjóðs.“
Borgin hafi náð þessum árangri með vönduðum langtímaáætlunum og með því að bregðast markvisst við áföllum. Borgin setti sér mælanleg markmið og sé að ná þeim öllum.
„Árangur borgarinnar í fjármálum byggir á því að gera vandaðar langtímaáætlanir, bregðast við áföllum með því að vinna sig út úr þeim í markvissum skrefum. Viðbrögðin við því erfiða efnahagslega umhverfi sem sveitarfélög, fyrirtæki og heimili búa við þessi misserin eru gott dæmi um þetta. Eftir að verðbólgan rauk af stað gerðum við plan – í upphafi kjörtímabils – og settum okkur mælanleg markmið. Þeim erum við að ná – öllum. Hvet ég alla frambjóðendur – ekki bara Sjálfstæðisfólk – til að kynna sér þetta vinnu- og verklag. Um leið vil ég færa starfsfólki borgarinnar og stjórnendum þakkir fyrir að leggjast á árarnar með okkur til að ná þessum eftirtektarverða árangri.“
