Villa var gerð í ársreikningi Reykjavíkurborgar sem birtur var í vikunni en brugðist var við því með því að birta uppfærða útgáfu nú fyrir stundu. Villan hafði þær afleiðingar að rekstrarstaða borgarinnar versnaði nokkuð en samkvæmt nýju útgáfunni var veltufé frá rekstri borgarsjóðs ekki jákvætt um 424 milljónir króna, heldur neikvætt um 2.049 milljónir króna. Munar þar tæplega 2,5 milljörðum króna. Viðskiptablaðið greindi fyrst frá.

„Við endurskoðun reyndust verðbætur í sjóðstreymi oftaldar um 2.492 m.kr. og lántaka vantalin um sömu fjárhæð. Er hér um áfallnar verðbætur á verðtryggð skuldabréf á útgáfudegi að ræða sem lagðar voru við verðbætur í sjóðstreymi í stað færslu á ný lán. Leiðréttingin hefur áhrif á niðurstöðu veltufjár frá rekstri og fjármögnunarhreyfingar í sjóðstreymi. Áhrif á rekstrar- og efnahagsreikning eru engin,“ segir í tilkynningu frá Reykjavíkurborg vegna málsins.

Hávær umræða hefur verið um erfiða fjárhagsstöðu borgarinnar undanfarið. Þannig hefur verið greint frá því að Reykjavíkurborg hafi tvívegis á stuttum tíma hætt við fyrirhugað skuldabréfaútboð. Hafa gagnrýnendur haldið því fram að ástæðan sé sú að lítil eftirspurn hafi verið eftir slíkri útgáfu hjá fjárfestum en því hefur Dagur B. Eggertsson, borgarstjóri, staðfestlega vísað á bug og sagt að ástæðan sé sú að markaðsaðstæður séu óheppilegar og að Reykjavíkurborg geti vel beðið eftir því að skilyrði verði hagstæðari.

Í umfjöllun Viðskiptablaðsins kemur fram að áðurnefnd villa geti haft  minnkað enn áhuga fjárfesta á að kaupa skuldabréf af borginni. Þá geti það líka valdið því að bankar fari sér hægar í að veita borgarsjóði fyrirgreiðslu, auk þess sem kjörin ættu undir venjulegum kringumstæðum að versna.