Í leiðara Morgunblaðsins í dag er staðhæft að skjólgarðar fyrir flóttamenn sem yfirvöld leggja nú drög að séu í raun flóttamannabúðir:
„Þúsundir „hælisleitenda“ hafa komið hingað til lands í skjóli veikburða reglna, mun veikari en í nágrannalöndum okkar, sem verða svo enn veikari þegar kærunefndin túlkar þær og galopnar landið. Kærunefndin ber ekki af þessu nokkurn kostnað, en skattgreiðendur hér á landi sitja uppi með það að þurfa að sjá öllu þessu fólki farborða. Milljarðarnir hlaðast upp enda þarf að fæða og klæða þá sem hér búa og geta ekki séð fyrir sér sjálfir. „Flóttamennirnir“ þurfa læknisaðstoð, ekki síður en aðrir og jafnvel enn frekar, sem á þátt í að skýra gríðarlegt álag á heilbrigðiskerfið. Og þeir þurfa einnig húsnæði, sem hefur orðið til þess að nú áformar félags- og vinnumarkaðsráðuneytið, í samvinnu við Reykjavíkurborg og í framhaldinu fleiri sveitarfélög, að koma upp flóttamannabúðum. Þær mega þó ekki heita flóttamannabúðir enda hljómar það ekki vel, þær eiga að heita skjólgarðar. Líklega dugar sú nafngift til að blekkja þá sem vilja láta plata sig, en innan við þrjú ár eru síðan þáverandi þingflokksformaður Vinstri grænna sagði á Alþingi að það kæmi „ekki til greina að koma upp flóttamannabúðum á Íslandi og þingflokkur Vinstri grænna mundi aldrei samþykkja slíkt.““
Hvað sem þessum yfirlýsingum líður þá vinni nú ráðherra VG að byggingu slíkra búða, segir í leiðaranum. Í bréfi félags- og vinnumarkaðsráðuneytisins um málið til borgarstjóra, sem dagsett er 12. apríl, segir að búðirnar séu „fyrir umsækjendur um alþjóðlega vernd líkt og önnur ríki víða í Evrópu hafa verið að gera. Eru slíkar byggðir hugsaðar sem tímabundin lausn meðan aðrir möguleikar til búsetu flóttafólks eru takmarkaðir líkt og staðan er í dag.“
Í leiðaranum eru tök stjórnvalda á flóttamannavandanum gagnrýnd. Annars vegar hafi í skjóli og vægra reglna orðið stjórnlaus straumur af hælisleitendum frá Venesúela hingað til lands, hins vegar valdi kærunefnd útlendingamála vanda eftir að Útlendingastofnun herti reglur sínar varðandi Venesúela. Er gagnrýnt að vald í þessum málaflokki sé fært frá ráðherrum til andlitslausra kærunefnda. Í leiðaranums segir ennfremur:
„Hver hefði trúað því fyrir fáeinum árum að aðstæður yrðu slíkar hér á landi að eina leiðin sem stjórnvöld sæju út úr vandanum væri að reisa flóttamannabúðir hér á landi?! Þáverandi þingflokksformaður VG taldi þetta bersýnilega óhugsandi, sem það hefði átt að vera. Hvað þarf til að ríkisstjórn og Alþingi taki í taumana, setji skýrar reglur og framfylgi þeim svo að forða megi Íslandi frá flóttamannabúðum?“