Síðari dagur leiðtogafundar Evrópuráðsins í Hörpu er hafinn.
Klukkan 14.30 hefst blaðamannafundur leiðtoganna þar sem niðurstöður fundarins verða kynntar. Nú stendur hins vegar yfir málefnastarf sem fer að mestu fram í salnum Silfurbergi í Hörpu.
Í fréttum RÚV kemur fram að Þórhildur Sunna Ævarsdóttir, þingmaður Pírata, fullyrði að íslensk stjórnvöld hafi sótt það stíft að halda fundinn hér á landi. Það sé ekki rétt að það sé algjör tilviljun að vilji leiðtoga aðildarríkja Evrópuráðsins til að halda slíkan fund hafi borið upp á sama tíma og Ísland gegnir formennsku í ráðinu.
RÚV segir einnig frá því að Katrín Jakobsdóttir, forsætisráðherra, hafi skýrt frá því á fundinum í morgun að 41 af 46 aðildarríkjum Evrópurráðsins hafi undirritað viljayfirlýsingu um gerð skrár yfir allt tjón sem Rússland hefur valdið í Úkraínu með innrás sinni. Samkvæmt fréttum RÚV á að taka saman í skránni manntjón, fjárhagslegt tjón, eignatjón og einnig tjón á umhverfi og vistkerfum.
Jóhanna Vigdís Hjaltadóttir, fréttamaður RÚV, segir niðurstöðu fundarins skipta miklu máli fyrir Katrínu. Hún hafi unnið baki brotnu eftir að fyrir lá að fundurinn yrði haldin hér á landi. Jóhanna segir að það myndi eflaust hafa jákvæð áhrif á stjórnmálaferil Katrínar ef niðurstaða fundarins væri í þeim anda sem hún vonaðist til.
Í fréttum Mbl.is kemur að þeir þjóðarleiðtogar sem enn eru á landinu hafi gert sér ýmislegt annað til dundurs en að funda. Jonas Gahr Støre, forsætisráðherra Noregs, fór í sund sem hann gerir að sögn í hvert skipti sem hann kemur til Íslands. Emmanuel Macron, forseti Frakklands, skoðaði sig um á Þingvöllum áður en hann hélt af landi brott. Forseti Ungverjalands, Katalin Novak, og forseti Póllands, Andrzej Duda, fóru bæði í ræktina.
Einnig kemur fram hjá Mbl.is að Marija Pejcinovic Buric, framkvæmdastjóri Evrópuráðsins hafi lýst því yfir að yfirlýsingin um tjónaskránna sé sögulegt afrek. Samkvæmt miðlinum var tjónaskráin formlega stofnsett með undirritun í Hörpu, af aðildarríkjum ráðsins muni Tyrkland, Serbía, Armenía, Ungverjaland, Bosnía og Aserbaídjan ekki taka þátt í gerð skrárinnar. Sá fjöldi passar þó ekki við það sem kemur fram í fréttum RÚV um að fimm ríki ætli ekki að taka þátt.
Auk aðal fundarins hafa margir smærri, tvíhliða og óformlegir fundir átt sér stað. Þórdís Kolbrún Reykfjörð Gylfadóttir, utanríkisráðherra, segir í samtali við Vísi að hún telji að gera ætti meira af því að hafa óformleg samtöl milli þjóðarleiðtoga.
Hjá Mbl kemur einnig fram að önnur mál en tjónaskráin hafi verið rædd á fundinum. Edi Rama, forseti Albaníu, hafi haldið harðorða ræðu þar sem hann skoraði á Evrópuráðið að draga til baka skýrslu frá 2010 þar sem Albaníu og Frelsisher Kosovo væri gefið ranglega að sök, að undirlagi Rússa, að hafa brotið mannréttindi og stundað sölu á líffærum úr mönnum.