„Ég fékk símtal á miðnætti, þar sem ég er frönskumælandi og var beðinn um að fara þarna um sem leiðsögumaður, það var mér ljúft og skylt enda verið leiðsögumaður í áratugi,“ segir Dúi Landmark, sem hefur lagt gjörva hönd á margt í gegnum tíðina, en starfar nú sem upplýsingafulltrúi matvælaráðherra. Dúi var beðinn um að sýna Emmanuelle Macron, Frakklandsforseta, Þingvelli í morgun.

„Ég og þjóðgarðsvörður vorum komnir þarna um klukkan sex eða hálfsjö og stilltum okkur af, og síðan kom forsetinn og hans fylgdarlið klukkan hálfátta,“ segir Dúi, en rigningunni slotaði nokkuð á meðan dvöl Marcon á Þingvöllum stóð. „Það var allt blautt er hann kom en það ýrði örlítið úr lofti, en það var logn og fallegt veður.“

Dúi segir að Macron hafi verið mjög forvitinn um land og þjóð og stórhrifinn af náttúrufegurðinni á Þingvöllum. „Hann spurði margvíslegra spurninga um land og þjóð og sýndi mikinn áhuga á náttúrufarinu. Hann spurði hvernig lífi Íslendingar lifðu, hvort við vinnum mikið.“

Dúi segir að ekki hafi spillt fyrir að Macron er mikill fluguveiðiáhugamaður en Dúi hefur lengi fengist við það tómstundagaman. „Þetta er afskaplega skemmtilegur maður í viðkynningu og þetta var góð stund,“ segir hann ennfremur.