Það sama á við um Donald Trump, forvera Biden í Hvíta húsinu. Þrátt fyrir að hann hafi gert grín að aldri Biden í kosningabaráttunni 2020 og kallað hann „sleepy Joe“ þá er umræða af þessu tagi farin að beinast að honum sjálfum.
Gott dæmi um þetta mátti heyra þegar Nikki Haley, fyrrum sendiherra Bandaríkjanna hjá SÞ, tilkynnti að hún vilji verða forsetaframbjóðandi Repúblikana. Þá sagði hún eiginlega skýrt á milli línanna að Trump sé orðinn of gamall til að gegna forsetaembættinu.
Hún sagði að baráttan fyrir þessa öld vinnist ekki ef áfram verður haldið að treysta á stjórnmálamenn frá síðustu öld.
Haley hefur lagt til að forsetar og þingmenn verði að gangast undir próf á andlegri getu þeirra þegar þeir ná 75 ára aldri. Þessi tillaga féll í grýttan jarðveg hjá ýmsum en aðrir taka henni fagnandi.
Ef Joe Biden býður sig fram aftur og nær kjöri, verður hann orðinn 86 ára þegar hann lætur af embætti. Þetta virðist hræða marga Bandaríkjamenn. Nýleg skoðanakönnun, sem var gerð fyrir AP, sýndi að aðeins 37% kjósenda Demókrataflokksins vilja að Biden bjóði sig fram á nýjan leik.
