Svona hefst pistill eftir Björn Leví Gunnarsson, þingmann Pírata, í Morgunblaðinu í dag en hann ber fyrirsögnina „Blindur leiðir haltan“. Umfjöllunarefnið er, eins og fram kemur í innganginum, ríkisstjórnarsamtstarfið.
Björn bendir á að í Lindarhvolsmálinu sé búið að birta lögfræðiálit á vefsíðu Lindarhvols þar sem segi að „„skylt sé […] að veita almenningi aðgang að skýrslu setts ríkisendurskoðanda“ og að ekki verði séð „að greinargerðin hafi að geyma upplýsingar af því tagi sem heimilt er […] að takmarka aðgang að“.“
„Það á sem sagt að birta skýrsluna og ekki eyða út neinu í henni fyrir birtingu. En ríkisstjórnin fer undan í flæmingi. Allt nefndarfólk í forsætisnefnd vill birta greinargerðina, nema forseti þingsins. Samt segja þau svo í þingsal að þeim sé bannað að birta greinargerðina samkvæmt lögum – og vísa þá í niðurstöður úrskurðarnefndar um upplýsingamál sem komst að þeirri niðurstöðu að ríkisendurskoðanda bæri ekki að birta greinargerðina,“ segir Björn og bætir við að þetta sé klassísk afvegaleiðing því umrætt skjal sé hjá Alþingi.
Hann bendir á að í lögfræðiálitinu komi skýrt fram að greinargerðin væri send ríkisendurskoðanda „„ásamt öllum vinnugögnum““.
„Greinargerð setts ríkisendurskoðanda var svo einnig send til fjármála- og efnahagsráðherra, Lindarhvols, Seðlabanka Íslands og umboðsmanns Alþingis. Ekki með vinnugögnum. Settur ríkisendurskoðandi kláraði ekki skýrsluna heldur skrifaði greinargerð um þau þrjú ár sem hann rannsakaði málið og skilaði þeirri greinargerð um sína vinnu til Alþingis. Þetta er algerlega skýrt í lögum um ríkisendurskoðanda: „Skýrslur, greinargerðir og önnur gögn sem ríkisendurskoðandi hefur útbúið og eru hluti af máli sem hann hyggst kynna Alþingi geta fyrst orðið aðgengileg þegar þingið hefur fengið þau afhent.“ Það er löngu búið að afhenda þinginu þessa greinargerð og það er líka löngu búið að segja að þinginu sé skylt að birta greinargerðina,“ segir Björn.
Í niðurlagi pistilsins spyr hann hvers vegna ríkisstjórnin endurtaki bara sömu möntruna um að henni sé bannað með lögum að birta upplýsingar og segir það óskiljanlegt, sérstaklega miðað við að þótt greinargerðin teldist vera vinnugagn, sem þyrfti ekki að birta, þá væri ekkert sem bannar það bókstaflega.
„Útúrsnúningurinn er því algjör, eins og venjulega. Það er því spurning hversu lengi þetta samfélag getur gengið á því að Sjálfstæðisflokkurinn leiði Vinstri-græn á meðan Framsókn horfir bara á. Þangað til það er búið að klára að selja Íslandsbanka? Og Isavia? Hvað fá þau í staðinn?“ spyr hann síðan að lokum.