Daníel E. Arnarsson, varaþingmaður Vinstri grænna og framkvæmdastjóri Samtakanna ’78 hefur sagt sig úr stjórnmálaflokknum eftir að útlendingafrumvarp Jóns Gunnarssonar, dómsmálaráðherra, var samþykkt á Alþingi í gær.
Daníel, sem er fyrrum framkvæmdastjóri Vinstri grænna, greinir frá þessu í færslu á Facebook-síðu sinni en ætlar ekki að taka sæti aftur á þingi jafnvel þó að hann verði kallaður inn. Meirihluti Alþingis, þar á meðal þingmenn Vinstri grænna, samþykktu frumvarpið sem var afar umdeilt en ekki var hlustað á fjölmargar breytingatillögur annarra þingmanna.
Að mati Daníels skerðir frumvarpið réttindi eins viðkvæmasta og jaðarsettasta hóp samfélagsins. Hann segist hafa skráð sig úr flokknum einungis nokkrum mínútum eftir að frumvarpið var samþykkt.
„Þegar ég bauð mig fram í prófkjöri VG 2021 þá var eitt af mínum áherslumálum meiri mannúð þegar kemur að þessum hópi. Ég fékk fjölda fólks til að ganga til liðs við hreyfinguna, fólk sem var mér sammála í þessum efnum og ég fékk mikinn stuðning frá þessum einstaklingum. Fyrir það verð ég ávallt þakklátur,“ skrifar Daníel.
Hann segist verið á móti frumvarpinu alla sína tíð og reynt sitt allra besta til að stöðva það. Það hafi ekki tekist og hann finni til ábyrgðar vegna þess. Sautján ára vegferð hans með Vinstri grænum sé því lokið.
„Þess vegna eru þessi skref afskaplega þung. Mér þykir enn afar vænt um fólkið í VG en því miður þá get ég ekki staðið á bakvið hreyfingu sem samþykkir skerðingu á réttindum til eins viðkvæmasta hóp samfélagsins.“
Daníel skipaði þriðja sæti á lista Vinstri græna í Reykjavíkurkjördæmi suður fyrir kosningarnar 2021. Þingflokkurinn náði þar inn tveimur mönnum, Svandísi Svavarsdóttur matvælaráðherra og svo Orra Páli Jóhannssyni sem uppbótarþingmanni. Komi til þess að leysa þurfi annaðhvort þeirra af mun Daníel því ekki svara kallinu.
