Elva Hrönn Hjartardóttir, starfsmaður VR, sem bauð sig fram sem formaður gegn Ragnari Þóri Ingólfssyni, þakkar fyrir stuðninginn liðnar vikur.
Eins og fram kom í fréttum fyrr í dag var Ragnar Þór formaður VR með 57,03% atkvæða en Elva Hrönn hlaut um 39,44%.
Sjá einnig: Ragnar Þór endurkjörinn formaður VR
„Þessi kosningabarátta var allskonar, mikil áskorun og oft og tíðum erfið en svo sannarlega fræðandi og skemmtileg líka. Ég er virkilega þakklát fyrir öll hvetjandi skilaboðin, góðar móttökur á þeim fjölmörgu vinnustöðum sem ég heimsótti og þær góðu samræður sem ég hef átt við félaga mína í VR,“ segir Elva Hrönn í færslu á Facebook.
Hún segist ganga stolt frá borði og sjá ekki eftir neinu. „Tæp 40% er ansi gott og nokkuð ljóst að það eru fleiri en ég sem vilja breytingar innan VR. Ég óska nýrri forystu velfarnaðar í starfi og vona að fjölbreytileiki innan félagsins og ólíkir hagsmunir félagsfólks fái meiri hljómgrunn héðan í frá. Takk fyrir mig.“