Vilhjálmur Birgisson, formaður Starfsgreinasambandsins, er allt annað en sáttur við endurskoðanda nokkurn sem hann segir að „réttlæti það ofbeldi sem nánast allir Íslendingar fordæma.“ Málið snýst um greiðsluseðil af óverðtryggðu íbúðaláni sem verið hefur í dreifingu á samfélagsmiðlum og sýnir afborgun af húsnæðisláni þar sem að lántakinn er að greiða um 500 þúsund króna afborgun en þar af fara 490 þúsund krónur í vexti en aðeins 10 þúsund krónur í niðurgreiðslu lánsins.
DV greindi svo frá því í gær að endurskoðandi nokkur tjáði sig um málið á Facebook-síðu sinni og benti á að þrátt fyrir háa afborgun þá hefði fasteignareigandinn samt grætt tæplega 23 milljónir króna á viðskiptunum miðað við ákveðnar forsendur sem hann gaf sér. Ráðlagði endurskoðandinn að fasteignaeigandinn myndi skipta yfir í verðtryggt lán til að lækka mánaðarlega afborgun og vildi meina, að staðan væri því alls ekki eins svört og Vilhjálmur og Inga vildu meina.
Vilhjálmur tjáði sig um málið í athugasemdakerfi fréttarinnar og var greinilega ekki skemmt.
„Jæja fannst ekki einn endurskoðandi sem réttlætir það ofbeldi sem nánast allir Íslendingar fordæma Réttlætir að heimili sem er með 57 milljóna húsnæðislán sé að borga tæp 500 þúsund í hverjum mánuði í vexti og 10 þúsund krónur inná höfuðstólinn. Réttlætir að heimili þessa lands séu að greiða 200% til 400% hærri vaxtagjöld en í þeim löndum sem við viljum bera okkur saman við.Jú þetta vaxtaofbeldi er að mati þessa endurskoðenda ekkert mál því fasteignin hefur „hækkað“ svo mikið að viðkomandi heimili hefur „grætt“. Ég segi bara, kanntu annan!,“ skrifaði Vilhjálmur.
Sagði Vilhjálmur að rök endurskoðandans héldu engu vatni enda skipti það 95% heimila þess lands engu máli hvort húseign A hækki um 20% því húseign B hefur hækkað um nákvæmlega sömu prósentu og allt venjulegt fólk þarf að búa einhversstaðar.
„Ef venjuleg fjölskylda selur sína húseign og þarf að kaupa aðra þá hefur hún hækkað um sömu % og þeirra húseign nam og hvar liggur þá þessi „gróði“ sem þessi endurskoðandi heldur fram? Hins vegar liggur fyrir að sterkefnaðir fjárfestar sem fjárfesta og kaupa upp húseignir eins og enginn sé morgundagurinn vítt og breitt um höfuðborgarsvæðið þeir eru svo sannarlega að græða. En fyrir Jón og Gunnu sem þurfa þak yfir sína fjölskyldu skiptir hækkun á fasteignaverði ekki nokkru máli enda framfleytir fjölskylda sér ekki á hækkun á fasteignaverði. En það skiptir Jón og Gunnu svo sannarlega máli þegar stórhluti ráðstöfunartekna þeirra fer í að greiða okurvexti, verðtryggingu og himinn há þjónustugjöld til fjármálakerfisins,“ skrifar Vilhjálmur og segir það með öllu óskiljanlegt að reyna að réttlæta málið með slíkum rökum.
