Samtök atvinnulífsins (SA) munu í dag afhenda Eflingu stefnu vegna niðurstöðu atkvæðagreiðslunnar í gærkvöld þar sem starfsfólk nokkurra hótela í borginni samþykkti verkfall.
Fréttablaðið greinir frá þessu. Fjöldi á kjörskrá var 287 en af þeim greiddu 189 atkvæði og var því kjörsókn 66 prósent. Um tveir þriðju greiddu atkvæði með verkfallstillögunni en rétt rúmlega 30% greiddu atkvæði gegn henni.
Halldór Benjamín Þorbergsson, framkvæmdastjóri SA, segir í samtali við Fréttablaðið að samtökin telji verkfallsboðunina vera ólöglega og stefna samtökin Eflingu fyrir Félagsdóm.
Halldór telur að ekki sé meirihluti innan Eflingar í heild fyrir verkfalli þó að niðurstaðan í þessari tilteknu atkvæðagreiðslu hafi orðið með þessum hætti. Hann minnir á að félagar í Starfsgreinasambandinu (SGS) hafi samþykkt samskonar samning og Eflingu stendur til boða með miklum meirihluta en það fólk sinni samskonar störfum og félagsfólk í Eflingu.