Nú eru formlegar meirihlutaviðræður hafnar í borginni og lítið virðist vera í vegi myndunar meirihluta Framsóknar, Samfylkingar, Pírata og Viðreisnar. Blaðamannafundur var haldinn fyrr í dag í Grósku í Vatnsmýri þar sem tilkynnt var að þau hefðu ákveðið að efna til viðræðna.

„Ég er mjög ánægður og bjartsýnn og hlakka til þess að verja næstu dögum með þessu ágæta fólki að tala um borgina okkar,“ sagði Dagur B. Eggertsson fráfarandi borgarstjóri meðal annars á fundinum.

Ekki eru þó allir jafnbjartsýnir. Ólafur F. Magnússon fyrrverandi borgarstjóri greindi frá efasemdum sínum um framtíð samstarfsins í tveggja erinda ferskeyttri vísu sem hann deildi á Fésbókarsíðuna sína fyrr í dag.

Framsókn undir vinstri sæng

Hallar sér á vinstri væng,
vænust Framsókn núna.
Með Samfylkingu undir sæng,
sárt er að missa trúna,

að Sundabrautin rísi senn
og samgöngurnar batni,
að líf við okkur leiki enn
og loforðin haldi vatni.