Morgunblaðið skýrir frá þessu og segir að góð mæting hafi verið á fundinn. Haft er eftir Einari að hreinskiptnar umræður hafi farið fram um framhald viðræðna um meirihlutamyndun og aðkomu Framsóknarflokksins að þeim.
Eins og fram hefur komið í fréttum þá tilkynnti Þórdís Lóa Þórhallsdóttir, oddviti Viðreisnar, að Viðreisn muni vera í bandalagi með Samfylkingunni og Pírötum um myndun meirihluta í borgarstjórn. Það þýðir að eins og staðan er núna er ekki hægt að mynda meirihluta til hægri með aðkomu Framsóknar.
Morgunblaðið segist hafa heimildir fyrir að samhljómur hafi verið innan grasrótar Framsóknar í gærkvöldi um að ef gengið verður til meirihlutaviðræðna við bandalag Samfylkingarinnar, Pírata og Viðreisnar verði gerði skýlaus krafa um að Einar fái borgarstjórastólinn allt næsta kjörtímabil.
Einar og hinir borgarfulltrúar flokksins funda í dag og taka ákvörðun um hvort þau vilji hefja formlegar viðræður við flokkana þrjá.
