Uni Rasmussen tekur sæti Jørgen Niclasen í færeysku landsstjórninni og mun hann sjá um fjármál eyjanna. Það hefur vakið sérstaka athygli að Rasmussen er blindur en hann telur ekki að það muni koma í veg fyrir að hann geti sinnt embættinu.

Sermitisiaq segir að Fólkaflokkurinn hafi staðið frammi fyrir þeim vanda í síðustu viku að Jørgen Niclasen, formaður, hafi orðið að segja skilið við landsstjórnina í kjölfar þess að hann var staðinn að ölvunarakstri.

Uni Rasmussen tekur við embætti hans. Hann er 53 ára og hefur setið á Lögþinginu síðan 2019. Ekki var full samstaða innan flokksins um hver tæki við af Niclasen en niðurstaðan varð að Rasmussen tekur við embætti hans. Sumir flokksmenn vildu að reyndari stjórnmálamaður tæki við embættinu en þeir urðu undir.

Auk þess að vera frekar óreyndur í stjórnmálum þá er Rasmussen blindur og hafa margir áhyggjur af að það muni hafa neikvæð áhrif á getu hans til að gegna embættinu. Sjálfur segist hann spenntur fyrir verkefninu og sé spenntur fyrir að hefjast handa. Hann viti að hann muni fá góða hjálp.