Á gamlársdag tók nýtt fasteignamat gildi. Í því felst áætlað verðmat allra fasteigna. Þetta kemur fram í tilkynningu frá Húsnæðis- og mannvirkjastofnun (HMS).
„Alls eru um 220 þúsund fasteignir á Íslandi og jókst verðmæti þeirra talsvert milli ára, eða um 2.100 milljarða króna. Sérfræðingar fasteignaskrár HMS mátu allar fasteignir landsins, bæði íbúðarhús og atvinnuhúsnæði og telst heildarvirði þeirra vera 12.800 milljarðar króna. Þetta jafngildir 33 milljónum króna á hvern íbúa á Íslandi eða um 42 milljónir á hvern íbúa sem er 18 ára og eldri,“ segir í tilkynningunni.
Fasteignamat er tól til að gefa raunhæfa mynd af verðmæti fasteigna. Það er endurmetið árlega og er það meðal annars nýtt til að reikna út fasteignagjöld og tekið er mið af því við lánveitingar fjármálastofnana til húsnæðiskaupenda.
Í tilkynningunni segir enn fremur:
„Þá er einnig stuðst við fasteignamatið við útreikning vaxtabóta af hálfu ríkisins og getur hækkun matsins haft þau áhrif að sumir missi rétt til bóta, ef að nýuppfærð eignastaða þeirra skerðir bæturnar að fullu. Á móti kemur að ríkisstjórnin kynnti nýverið að eignaskerðingarmörk í vaxtabótakerfinu muni hækka um 50% í byrjun árs 2023 sem leiðir til þess að fleiri munu fá vaxtabætur en hefðu ella fengið eftir gildistöku nýja fasteignamatsins. Um var að ræða eina af stuðningsaðgerðum ríkisstjórnarinnar vegna nýgerðra kjarasamninga.“
