Vilhjálmur Birgisson, formaður Starfsgreinasambandsins, gefur lítið fyrir nýja greiningu Seðlabankans sem segir að greiðslubyrði húsnæðislána hafi aukist að meðaltali um 13-14 þúsund krónur á mánuði.
Frá því var greint í dag að samkvæmt þessari greiningu Seðlabankans, sem unnin var að ósk fjárlaganefndar Alþingis, hafi greiðslubyrði lána aukist að meðaltali 13-14 þúsund krónur á mánuði.
Vilhjálmur segir þessa framsetningu blekkingarleik.
„Þau eru alveg dásamleg þessi meðaltöl og sorglegt að sjá hvernig Seðlabankinn er að reyna að blekkja almenning á þessum gríðarlegu hækkunum sem orðið hefur á vaxtabyrði almennings á liðnum misserum.“
Vilhjálmur segir ýmsum blekkingum beitt. Til dæmis að velja upphafspunkt í janúar 2020 þegar grunnvextir hjá Landsbankanum á óverðtryggðu húsnæðisláni á breytilegum vöxtum 5,35% en eru núna í 7,4%. Vextir hafi nefnilega lækkað frá janúar 2020 og farið lægst í 3,9 prósent í október 2021.
„Skoðum þróun á húsnæðisláni sem var 40 milljónir og var tekið 1. jan 2020 en þá var vaxtabyrði 178 þúsund á mánuði en er í dag 246 þúsund og hefur því hækkað um 68 þúsund á mánuði.
Samskonar húsnæðislán sem tekið var í október 2021 á 3,9% breytilegum vöxtum var með vaxtabyrði sem nam 130 þúsund en er í dag 246 þúsund og hefur því hækkað um 117 þúsund á mánuði.
Við Seðlabankann vil ég segja, ekki reyna að leggja svona meðatals blekkingar á borð fyrir almenning.“