Logi Einarsson, formaður Samfylkingarinnar, kaus tvisvar þetta árið – fyrst utan kjörfundar á höfuðborgarsvæðinu fyrir helgi en síðan aftur á Akureyri í dag.

Hefðbundinn kjördagur gengur svona fyrir sig hjá honum: „Ég vakna yfirleitt temmilega snemma, klæðist frekar sparilegum klæðnaði og kýs fyrir hádegi. Síðan fer ég í kosningakaffið heima á Akureyri og sporðrenni brauðtertum og kaffi.“

Í dag vaknaði hann eldsnemma til að fljúga norður, í sitt kjördæmi. „Ætli konan mín sæki mig ekki á Akureyrarflugvöll og við fáum okkur morgunmat með Hrefnu dóttur okkar og förum svo að kjósa. Síðan fer ég í kosningakaffið og hitti fólkið mitt og tek að lokum síðdegisflugið aftur til Reykjavíkur því sem formaður stjórnmálaflokks þarf ég að mæta í viðtöl og svona fyrir sunnan um kvöldið á RÚV og Stöð 2. En annars vona ég að ég geti endað kvöldið með félögum mínum í flokknum í Gamla bíó og fagnað góðum árangri!“