Jóhannes Loftsson, oddviti Ábyrgrar framtíðar í Reykjavík norður, getur hvorki kosið sjálfan sig né flokkinn sem hann stofnaði í alþingiskosningunum á morgun. RÚV greinir frá.

Þrátt fyrir að Jóhannes bjóði sig fram í Reykjavíkurkjördæmi norður, þá er hann búsettur í Reykjavík suður. Flokkurinn er einungis með lista í Reykjavík norður og því engin leið fyrir hann að kjósa flokkinn.

Í samtali við RÚV segir hann að hann muni að öllum líkindum skila auðu þar sem hann hefur ekki marga valkosti.

„Maður bara tekur þessu eins og hverju öðru. Maður bjóst alveg við að þetta gæti gerst. Við erum ný og það er margt nýtt sem við erum að gera. Þetta er dálítið sérstakt. Ætli ég verði ekki að mæta á kjörstað upp á sjóið,“ segir Jóhannes en hann býr einungis nokkrum metrum frá kjördæmalínunni.

Flokkurinn hefur litlar mætur á sóttvarnaraðgerðum og er það helsta baráttumál Jóhannesar og annarra flokksmanna. Hann hefur skipulagt þónokkrar kröfugöngur um stræti Reykjavíkurborgar þar sem fólk er hvatt til að sleppa því að láta bólusetja sig gegn Covid-19.

Sjá einnig: Fámenn en hávær mótmæli við Stjórnarráðið

Allir aðrir flokkar sem eru í framboði eru með lista í öllum kjördæmum og því ættu ekki margir aðrir í framboði að hafa áhyggjur af því að geta ekki kosið flokkinn sinn.