Yfir helmingur landsmanna sögðust bera mikið traust til Katrínar Jakobsdóttur, forsætisráðherra og yfir þriðjungur til Sigurðar Inga Jóhannssonar, formanns Framsóknarflokksins. Rúmlega þrír af hverjum fjórum sögðust hins vegar bera lítið traust til Sigmundar Davíðs Gunnlaugssonar, formanns Miðflokksins og um fjórir af hverjum fimm sögðust bera lítið traust til Guðmundar Franklín Jónssonar, formanns Frjálslynda lýðræðisflokksins. Þetta er meðal þess sem fram kemur í könnun MMR á trausti til stjórnmálaleiðtoga á Íslandi. Traust til leiðtoga ríkisstjórnarflokkanna þriggja hefur aukist yfir síðastliðin tvö ár og mælist hærra en traust til leiðtoga annarra stjórnmálaflokka.
Katrín Jakobsdóttir (23%) og Sigurður Ingi Jóhannsson (27%) eru þeir stjórnmálaleiðtogar sem hvað fæstir sögðust bera lítið traust til og hefur hlutfallið farið minnkandi eftir því sem nær dregur kosningum. Þá hefur þeim fækkað sem segjast bera lítið traust til Þorgerðar Katrínar (úr 47% í 43%) en vantraust í garð annarra leiðtoga hefur mælst næsta óbreytt eða vaxandi.
Þá nýtur Sigurður Ingi Jóhannsson þeirrar sérstöðu að enginn kjósandi hans eigin flokks sagðist vantreysta honum en hjá öðrum stjórnmálaleiðtogum mældist það hlutfall á bilinu 1% (Inga Sæland) til 12% (Halldóra Mogensen).
Nokkurn mun má sjá eftir stjórnmálaskoðunum svarenda. Katrín Jakobsdóttir nýtur nær algers stuðnings meðal stuðningsfólks Vinstri-grænna – en 91% þeirra kváðust bera mikið traust til forsætisráðherrans. Katrín nýtur einnig mikils stuðnings meðal stuðningsmanna annarra flokka en nær þrír fjórðu hlutar stuðningsfólks Viðreisnar og Sjálfstæðisflokksins og yfir helmingur stuðningsfólks Framsóknar, Samfylkingar og Pírata kváðust bera mikið traust til hennar. Traust til Sigurðar Inga Jóhannssonar mældist mest meðal stuðningsfólks ríkisstjórnarflokkanna og Viðreisnar en traust til Bjarna Benediktssonar og Þorgerðar Katrínar Gunnarsdóttur mældist takmarkað hjá öðrum en stuðningsmönnum eigin flokka.
Niðurstöður könnunarinnar í heild sinni má nálgast hér á síðu MMR.
