Í kosningaþætti Hringbrautar í kvöld fara fram kappræður milli Vilborgu Þórönnu Kristjánsdóttur, frambjóðanda Miðflokksins, Ásmunds Einars Daðasonar, frambjóðanda Framsóknarflokksins og Ingu Sæland, frambjóðanda Flokks fólksins. Vilborgu varð ansi heitt í hamsi í þættinum eftir að hafa heyrt loforð flokkanna í kosningabaráttunni.
„Það er alltaf hægt að lofa öllu fögru fram í tímann en ætla menn að standa við það?“ spyr Vilborg í þættinum og Sigmundur Ernir Rúnarsson, stjórnandi þáttarins, spyr hana þá á móti hvort Miðflokkurinn sé ekki einmitt að því líka. Vilborg segir að munurinn þar á sé að Miðflokkurinn ætli að standa við sín loforð.
„Við ætlum okkur að standa við það, ég hef ekki verið á þingi,“ segir Vilborg og við það byrjar Inga Sæland að hlægja dátt. „Mér finnst mjög dónalegt þegar það er verið að hlæja hérna þegar fólk er að tala en Inga verður náttúrulega bara að eiga það við sig,“ segir Vilborg í kjölfarið.
Inga Sæland segir þá að hún hafi verið að hlægja vegna þess að Vilborg hafi verið að segja sannleikann. „Mér fannst þetta skemmtilegt vegna þess að þú varst að segja satt.“
Klippu af þessu má sjá hér fyrir neðan:
