Í kvöld hefst þátturinn Vikan með Gísla Marteini á ný á RÚV. Gestir Gísla í kvöld eru toppeintök en þar má nefna Eddu Falak, Ólafur Þ. Harðarson og Grétar Theódórs.

Gríntvíeykið Tvíhöfði sem þeir Sigurjón Kjartansson og Jón Gnarr skipa munu grilla frambjóðendur til alþingiskosninga í þættinum og hefur RÚV birt stutta klippu frá viðtölum þeirra.

Í klippunni má heyra svör frambjóðenda við spurningu þeirra Jóns og Sigurjóns sem hljóðar svo: „Hefur þú drukkið landa?“. Landi er einn af þjóðardrykkjum Íslendinga og því kemur lítið á óvart að allir frambjóðendur segjast hafa smakkað drykkinn.

Katrín Jakobsdóttir forsætisráðherra virtist skammast sín þegar hún svaraði spurningunni játandi á meðan Guðmundur Auðunsson, oddviti Sósíalistaflokksins í Suðurkjördæmi, lætur eins og ekkert sé eðlilegra.

Ásmundur Einar Daðason, félags- og barnamálaráðherra, var hins vegar gáttaður á spurningunni og taldi hana nánast fáránlega.

„Kommon, það hafa allir drukkið landa. Er þetta í alvörunni spurning? Allir sem eru úr sveit hafa drukkið landa,“ sagði Ásmundur.

Önnur spurning sem frambjóðendur fengu var hvort þeir hefðu prófað ólögleg vímuefni. Ekki kemur fram hverjir svöruðu játandi en það kemur fram í þættinum í kvöld.