Ein þeirra fyrirspurna sem Sigmundur Davíð Gunnlaugsson, formaður Miðflokksins, lagði fram á Alþingi í gær vakti athygli en þar spurði hann forsætisráðuneytið hversu mörg kyn væru til að mati ráðuneytisins. Fyrirspurnin var ein af 16 sem hann lagði fram í gær.
DV náði tali af Sigmundi og spurði hann hvað hann teldi kynin vera mörg og hvernig hann skilgreindi sitt kyn.
„Þetta er ekki spurning um hvað ég tel að þau séu mörg heldur hvað er náttúruleg staðreynd. Það eru tvö kyn. Ég er karlkyns, ég þurfti svo sem ekki að skilgreina það sjálfur, það kom fram á fæðingarvottorði mínu,“ segir Sigmundur, en fyrir utan á karlkyn og kvenkyn getur fólk skráð sig sem kynsegin/annað inni á vef Þjóðskrár.
Hann segir að ástæðan fyrir því að hann hafi lagt þessa fyrirspurn fram sé sú að orðalag í frumvörpum frá stjórnvöldum hafi ruglandi áhrif á þá löggjöf sem hefur verið byggð hér upp árum og áratugum saman.
„Menn hafa gagnrýnt svona tilburði mikið víða erlendis og sérstaklega út frá jafnréttismálum. Femínistar og jafnréttissinnar hafa sett út á að þetta hefur ruglandi áhrif á þann árangur sem hefur náðst í jafnréttismálum. Það hefur raunveruleg áhrif hvernig hlutir eru orðaðir í lögum. Það getur haft ruglandi áhrif. Lög eiga ekki að vera ruglandi, þau eiga að vera skýrandi,“ segir Sigmundur og vill meina að þetta sé gert til að gert til að gera hlutina óljósari.
Þú meinar þá að þessi barátta sé að trufla fyrir öðrum mikilvægum baráttuefnum?
„Á þinginu hef ég heyrt talað um „aðila með leg“ en það var tilraun til að taka orðin móðir og kona úr ákveðnum lögum. Ég sakna þess að það skuli ekki hafa farið fram alvöru umræða um að þetta á Íslandi. Ég hef séð mikla umræðu um þetta erlendis þar sem femínistar hafa verið í framarlega í flokki. Hér er þessu laumað inn í frumvörp af ríkisstjórn án þess að það hafi verið rætt hvaða áhrif þetta hafi,“ segir Sigmundur.
Hann tók sérstaklega fram að hann hafi ekkert á móti því að fólk skipti um kyn þegar það upplifir sig sem konu eða karl, en ekki eitthvað annað.