Fréttablaðið skýrir frá þessu í dag. „Ég hef fulla trú á því að þetta framtak opni augu manna fyrir því að það er komið að endalokum núverandi fyrirkomulags á smásölu áfengis þar sem ríkið hefur allt í hendi sér. Að sú stund sé runnin upp og ekki verði stigið til baka,“ er haft eftir Andrési.
Það var franska fyrirtækið Santewines SAS, sem er í eigu Arnars Sigurðssonar, sem opnaði netverslunina sante.is í byrjun maí. Viðskiptavinir geta keypt áfengi þar og fengið það afhent af lager hér á landi um leið og kaupin hafa átt sér stað. Með þessu gat fólk í fyrsta sinn keypt áfengi af innlendum vörulager án þess að ÁTVR hefði milligöngu þar um.
ÁTVR sagði um miðjan maí að fyrirtækið myndi krefjast þess að lögbann yrði sett á starfsemina og kærði hana einnig til lögreglu. Lögbann er bráðabirgðaaðgerð og er því að sjá sem ÁTVR hafi ekki haft árangur sem erfiði með að fá lögbannskröfu samþykkta og ekki er að sjá að lögreglan hafi talið lagalegan grundvöll til að grípa inn í málið.
Andrés sagðist eiga von á að stór smásölufyrirtæki fylgi nú í fótspor Sante. „Ég held að flestir hafi á tilfinningunni að ÁTVR sé óvisst um hvernig það eigi að bregðast við. Fyrstu viðbrögðin voru að fara í hart og krefjast lögbanns á starfsemi Sante. Það hefur ekki gengið eftir. Það hafa ekki verið neinar aðgerðir af hálfu sýslumanns eða lögreglunnar sem vitað er um. Eftir því sem tíminn líður þeim mun meira styrkjast menn í trú um að ekki verði til baka snúið,“ sagði hann.
