Þórarinn Ingi Pétursson, þingmaður Framsóknar, hefur lagt fram frumvarp til laga um breytingar á ýmsum lögum sem varða áfengi, ásamt fleiri þingmönnum Framsóknar.
Helstu breytingarnar sem koma fram í frumvarpinu eru heimild til smásölu á framleiðslustað smærri áfengisframleiðenda, það er framleiðendur á öli og sterku áfengi, sem og afsláttur af áfengisgjöldum.
Markmið frumvarpsins er að auka við stuðning til smærri innlenda áfengisframleiðenda og auka samkeppnishæfni þeirra, en mikil gróska hefur verið í greininni undanfarin ár. Þá sérstaklega á landsbyggðinni. Einnig er frumvarpinu ætlað að stuðla að frekari atvinnutækifærum til að mynda innan ferðaþjónustunnar.
Fram kemur í greinargerð að sambærileg löggjöf nágrannaríkja Íslands var höfð til hliðsjónar við gerð frumvarpsins og eru báðar aðferðir, það er afsláttur af áfengisgjöldum og leyfi til smærri framleiðenda fyrir sölu á framleiðslustað, viðurkenndar til að auka samkeppnishæfni smærri innlendra áfengisframleiðenda á markaði.