Björn Leví Gunnarsson, þingmaður Pírata, segist ætla að kæra sjálfan sig fyrir ummæli sem hann birti á Facebook-síðu sinni í dag og í Morgunblaðinu. Hann segist vita að ummælin stangast á við siðareglur Alþingis en ummælin sem um ræðir eru um Ásmund Friðriksson og aksturskostnað hans.
Í grein Björns í Morgunblaðinu segir hann siðareglur Alþingis vera reglur sem hann vill fara eftir og þess vegna hafi hann skrifað undir að hann myndi fara eftir þeim. Hann hafi ekki tekið þátt í að semja þær fyrir fimm árum en hann sé sammála þeim.
„Þess vegna tel ég nauðsynlegt að segja að það er rökstuddur grunur um að Ásmundur Friðriksson hafi dregið að sér fé, almannafé, og við erum ekki að sjá viðbrögð þess efnis að það sé verið að setja á fót rannsókn í þeim efnum. Ég segi þetta þrátt fyrir að ég viti að þessi ummæli hafi verið sögð brjóta gegn siðareglum alþingismanna – vegna þess að ummælin voru og eru rökstudd; af viðurkenningu Ásmundar í Kastljósi og síðar með endurgreiðslu á umræddum akstursgreiðslum,“ segir Björn en bendir á að hann hefur ekki aðgang að neinum öðrum gögnum en þeim sem hafa birst opinberlega í fyrirspurnum hans til þingforseta en Björn er þekktur fyrir að vera fyrirspurnakóngur Alþingis.
Í maí 2019 komst siðanefnd Alþingis að þeirri niðurstöðu að Þórhildur Sunna Ævarsdóttir, varaformaður þingflokks Pírata, hafi brotið siðareglur Alþingis með ummælum sínum um aksturskostnað Ásmundar Friðrikssonar. Björn var sömuleiðis kærður fyrir orð sín en að mati siðanefndar braut hann engar reglur. Orð Þórhildar voru:
„Við sjáum það að ráðherrar þjóðarinnar eru aldrei látnir sæta afleiðingum, þingmenn þjóðarinnar eru aldrei látnir sæta afleiðingum. Nú er uppi rökstuddur grunur um það að Ásmundur Friðriksson hafi dregið að sér fé, almannafé, og við erum ekki að sjá viðbrögð þess efnis að það sé verið að segja á fót rannsókn á þessum efnum.“
Að sögn Björns er niðurstaða siðanefndar röng.
„Siðareglur eru almenn viðmið um hegðun og tjáningu. En ef túlkun þeirra byggist hins vegar á bókstafnum en ekki samhengi glatast hæðni og staðreyndir. Þannig verða til reglur sem eru notaðar til þess að siða aðra til og ganga á stjórnarskrárbundin réttindi þeirra,“
Hann lét sér ekki nægja að einungis skrifa í Morgunblaðið og bætti við ummælum á Facebook-síðu sinni. Hann ræðir þar um dómana sem féllu hjá siðanefnd Alþingis vegna orða hans og Þórhildar.
„Spurningin er einföld, er eðlilegt að rökstudd ummæli – með vísun í játningu og viðurkenningu á vafasömum aksturskostnaði sé brot á siðareglum? Á sama tíma og það er sagt að ekkert vafasamt hafi átt sér stað er kostnaðurinn samt endurgreiddur og Sunna sögð brjóta siðareglur fyrir að benda á á nýju föt keisarans,“ segir Björn
Hann bendir á að mál þetta snúist ekki um Ásmund heldur um siðanefndirnar og “þann hættulega stað þar sem siðareglur eru orðnar að reglum fyrir valdhafa til þess að siða aðra.“
Að lokum segir hann að það þurfi ekki að kæra ummæli hans til siðanefndar þar sem hann ætli að gera það sjálfur.