Í nýjasta DV fjallar Björn Jón Bragason um mögulegt stjórnarsamstarf að loknum alþingiskosningum í ljósi nýjustu kannana en nánast allir þeir kostir sem nefndir eru gera ráð fyrir að Framsóknarflokkur verði innanborðs. Sigurður Ingi Jóhannsson mun líklega geta samið til vinstri og hægri. Grípum niður í pistil Björns Jóns:

„Sigurður Ingi gæti líka allt eins hugsað sér að horfa til vinstri þar sem hann gæti með réttu gert kröfu um forsætisráðherrastólinn. Vinstristjórn Framsóknarflokks, Vinstri grænna, Samfylkingar og Pírata hefði nauman meirihluta sé tekið mið af áðurnefndri könnun eða 32 menn. Gleymum ekki að Sigurður Ingi er fyrrverandi forsætisráðherra, hefur þegið stórkross fálkaorðunnar og hitt Obama í Hvíta húsinu. Þess eru líka nokkur dæmi að forsætisráðherrastóllinn hafi hlotnast Framsóknarflokknum þrátt fyrir lítið fylgi. Flokkurinn galt afhroð í alþingiskosningunum 1978 sem dæmi – varð minnstur þingflokka en Ólafur Jóhannesson, formaður flokksins, engu að síður forsætisráðherra í skammlífri vinstristjórn sem mynduð var í kjölfarið.“