Samiðn, Samband iðnfélaga, hvetur stjórnvöld til að ganga lengra til stuðnings þeim sem misst hafa vinnuna í kjölfar Covid-19 og lent í fjárhagserfiðleikum. Þá telur Samiðn mikilvægt að átakinu Allir vinna verði fram haldið og sveitarfélögin standi við stóru orðin í tengslum við Covid-19 og komi að málum með auknum fjárfestingum. Ályktanir þessar voru samþykktar á fundi sambandsstjórnar Samiðnar sem haldinn var í Hannesarholti.
„Það eru jákvæð teikn á lofti í íslensku samfélagi með komu bóluefnis til landsins. Aukin bjartsýni er að íslenskt efnahagslíf nái auknum þunga á seinni hluta ársins 2021. Íslensk stjórnvöld hafa gripið til margvíslegra aðgerða til að styðja íslenskt atvinnulíf sem ber að fagna. Hins vegar er ljóst að ekki hefur verið gengið nógu langt fyrir þá sem hafa orðið fyrir atvinnumissi og eru í fjárhagslegum erfiðleikum. Mikilvægt að þar kom til frekari stuðnings. Samiðn hvetur íslensk stjórnvöld að halda betur utan um þá sem hafa orðið fyrir áföllum á þessum erfiðum tímum,“ segir Hilmar Harðarson, formaður Samiðnar.
Hilmar segir að Samiðn fagni þeim árangri sem náðst hefur í átakinu Allir vinna en á síðasta ári námu endurgreiðslur vegna þess tæpum 20 milljörðum króna. „Ljóst er að þetta hefur verið mikilsvert innlegg í þeim árangri sem íslenskt samfélag hefur þó náð í afar erfiðu og krefjandi árferði. Samiðn vill hvetja íslensk stjórnvöld að framlengja átakið enda fara þar saman hagsmunir allra. Samiðn telur milvægt að sveitarfélög auki við fjárfestingar sínar. Þegar tölulegar staðreyndir eru skoðaðar kemur í ljós að þau hafa því miður ekki staðið við stóru orðin í Covid faraldrinum.“