„Í dag greindist einn með kórónuveirusmit og var sá í sóttkví. Undanfarinn mánuð hafa mjög fáir verið að greinast með smit hér á landi og við erum ennþá eina landið í Evrópu sem er algrænt á korti Sóttvarnastofnunar Evrópu og höfum verið það frá því í lok janúar. Og enn erum við með fæst smit á hverja 100.000 íbúa í Evrópu sem er staða sem við erum þakklát fyrir. Ég tel að sóttvarnaráðstafanir á landamærum með tvöfaldri skimun og fimm daga sóttkví á milli hafi fyrir löngu sannað gildi sitt. Nú höfum við hert þessar ráðstafanir með kröfu um neikvætt PCR-próf fyrir komu til landsins og er það gert að tillögu sóttvarnaryfirvalda. Sú ákvörðun kom til framkvæmda í gær.“

Orðræða Katrínar miðast við þær forsendur að í lok júní verði búið að bólusetja 190.000 Íslendinga fyrir veirunni. Þetta er í samræmi við yfirýsingar heilbrigðisráðherra, Svandísar Svavarsdóttur, en margir draga í efa að þetta standist. Katrín segir:

„Á sama tíma skýrast línur hvað varðar bóluefni og afhendingu þess en í þessari viku skýrði heilbrigðisráðherra frá því að lokið yrði við að bólusetja 190.000 Íslendinga fyrir lok júní og miða þær tölur við þau þrjú bóluefni sem fengið hafa skilyrt markaðsleyfi sem eru frá Pfizer, Moderna og AstaZeneca. Þá hefur framkvæmd bólusetningar gengið mjög vel fyrir sig hér á landi og innviðir til að koma bóluefni hratt og örugglega til skila. Nú er staðan sú að þrátt fyrir takmarkanir vegna sóttvarnaráðstafana búa Íslendingar við hvað mest frelsi miðað við önnur þau lönd sem við berum okkur helst saman við. Við höfum staðið okkur vel í þessari baráttu við veiruna sem nú hefur staðið í næstum heilt ár. Sá árangur er mörgum að þakka en fyrst og fremst íslenskum almenningi.“

https://www.facebook.com/VGKatrinJakobsdottir/posts/10157905587327727