Guðni Ágústsson, fyrrverandi ráðherra og fyrrverandi formaður Framsóknarflokksins, fer yfir erfitt samstarf sitt við annan fyrrverandi formann flokksins og fyrrverandi forsætisráðherra, Halldór Ásgrímsson heitinn.
Guðni gerir upp þessa fortíð í þættinum Mannamál á sjónvarpsstöðinni Hringbraut í kvöld en Fréttablaðið greinir frá þessu.
Halldór Ásgrímsson leiddi Framsóknarflokkinn á árunum 1996 til 2006. Þann tíma var samstarfið milli hans og Guðna mjög erfitt, að sögn Guðna. Þeir áttu ekki skap saman og Halldór vildi ekki að Guðni yrði ráðherra í ríkisstjórn með Sjálfstæðisflokknum.
Segir Guðni að Halldór hafi einnig unnið gegn því að Guðni tæki að sér formennsku í flokknum sem hann þó gerði. Segir Guðni að hann og Halldór hafi oft ekki talað saman í langan tíma þó að þeir hafi unnið við sama ríkisstjórnarborðið.
Þá segir ennfremur í frétt Fréttablaðsins:
„Í viðtalinu, sem er kostulegt að hætta sagnamannsins Guðna er vandlega farið yfir uppákomuna þegar Davíð henti fjölmiðlafrumvarpinu í hendurnar á Halldóri, gáttuðum á svip, en svo er auðvitað fjallað um æskuár Guðna austur á Brúnastöðum þar sem frú Ingveldur vann það stórvirki að ala upp 16 börn sem hún fæddi á 21 ári, á meðan ektamaðurinn Ágúst Þorvaldsson sinnti öðru fremur þingmennsku í Reykjavík.“